Petropavlda Naýryzǵa arnap jeti myń baýyrsaq taratylady
PETROPAVL. QazAqparat - Petropavl ákimdiginde qalada jáne aýdandarda Naýryz meıramyn toılaý máselesi talqylandy, dep habarlaıdy QazAqparat tilshisi.
Petropavlda negizgi merekelik sharalar 21-23 naýryz kúnderi ótedi. Sońǵy jyldary ulttyq meıramymyzdy kópqabatty úılerdiń aýlalarynda toılaý ıgi dástúrge aınalyp keledi. Petropavl ákimi Marat Tasmaǵanbetovtiń aıtýynsha, bıyl meıramǵa kóppáterli turǵyn úılerdiń úshten biri - 300 turǵyn úı jumyldyrylady.
Qalanyń bas alańy bezendirilip, etnoaýyl boı kóteredi, altybaqan qurylyp, Soltústik Qazaqstan jáne Jambyl oblysynan kelgen qolóner sheberlerine arnalǵan kıiz úıler tigiledi.
M. Tasmaǵanbetovtiń sózine qaraǵanda, merekede qonaqtarǵa 7 myń baýyrsaq, 200 lıtr naýryz kóje jáne 2,3 tonna palaý taratylady.
Mádenıet, arhıvter jáne qujattama basqarmasynyń basshysy Ermek Raqymovtyń aıtýynsha, Táýelsizdik stelasynyń aldynda eki kún boıy qazaqsha kúres, toǵyz qumalaq, asyq atý, jilik syndyrý sııaqty ulttyq sport túrlerinen jarystar ótedi.
21 naýryzda oblystyń úzdik shyǵarmashylyq ujymdarymen qatar merekelik baǵdarlamaǵa qazaq estradasynyń juldyzy Aıqyn Tólepbergen de qatysady.
Oblys ákimi Qumar Aqsaqalov soltústikqazaqstandyqtar merekelik sharalarǵa barynsha tartylýy tıis ekenin aıtty.
«Alańdarǵa jınalǵan adamdar meıramdy sezinetin bolsyn, syrttaı baqylaýshy bolyp turmasyn. Uıymshyldyqpen ótkizýge daıyn turý qajet. Oblystyń árbir turǵyny meıramdy sezinsin», - deıdi Q. Aqsaqalov.
Eske sala keteıik, buryn óńir basshysy alańdarda tigilgen kıiz úılerdi jabýǵa tyıym salǵan bolatyn. Aýdandardyń ákimderi shyǵarmashylyq ujymdarymen birge meıramdy ózderiniń aýmaǵynda toılaıdy.
