Petropavlda naýryzdan bastap áýe reısteriniń jıiligi artady
Soltústik Qazaqstan oblysynyń jolaýshylar kóligi jáne avtomobıl joldary basqarmasynyń málimetinshe, Petropavl halyqaralyq áýejaıy qazirgi ýaqytta shtattyq rejımde jumys istep jatyr.
Ol kommýnaldyq menshikke ótti. Nysannyń eshkimge qaryzy joq.
«Byltyr sýbsıdııalaýdyń nátıjesinde áýe reısteriniń sany ulǵaıdy. Máselen tamyz aıynan bastap jyl sońyna deıin ushaqtarmen 16 179 jolaýshy tasymaldanǵan. Bul 2020 jyldyń uqsas kezeńimen salystyrǵanda 4 ese artyq. Qazirgi ýaqytta Petropavl áýejaıynan Nur-Sultan qalasyna aptasyna úsh ret – sársenbi, juma, jeksenbi kúnderi jáne Almatyǵa aptasyna eki ret dúısenbi jáne beısenbi kúnderi reıster bar», - deıdi basqarmanyń basshysy Maqsat Baıahmet.
Al 1 naýryzdan bastap bul qalalarǵa ushý jıiligi 2,5 ese artpaq. Nur-Sultan qalasyna kúndelikti jáne Almatyǵa aptasyna 5 ret ushaqtar shyǵarylmaq.
«Qazirgi ýaqytta Reseıdiń Túmen qalasyna halyqaralyq reısti ashý máselesi qarastyrylyp jatyr. «Utair» áýe kompanııasy Reseı úkimetinen ruqsat qujattardy aldy. Qazirgi ýaqytta bul másele QR Úkimetinde qaralady. QR zańnamasyna sáıkestigin qaraý úshin qujattar paketi qalyptastyrylady», - deıdi Maqsat Baıahmet.
Alǵashqy reıs 2 sáýirge josparlanǵan. Ushaq Túmennen jergilikti ýaqyt boıynsha tańǵy saǵat 09.10-da shyǵyp, túski saǵat 12.30-da Petropavldan keri ushady.
Bılettiń quny shamamen 18 myń teńge bolmaq.
