Petropavlda Naýryz meıramyna arnalǵan merekelik sharalar ótýde

Uıymdar men bilim mekemelerinde saıystar, kontsertter ótip jatyr. Sondaı-aq bilim ordalarynda shyǵys halqy úshin qasıetti jáne kóne mereke bolyp tabylatyn Naýryz meıramynyń tarıhy men dástúri jaıly syr shertetin sabaqtar, synyptan tys sharalar ótkizilýde.

Máselen, merekelik baǵdarlamanyń aıasynda qalalyq Mádenıet úıinde Astana qalasy ishki áskeri uıymdastyrǵan án men bı keshi ótti. Sonymen qatar «Abylaı hannyń ordasynyń» murajaı kesheninde «Shyraıly kóktem arýlary» atty fotokórme ashyldy. Ǵ. Músirepov atyndaǵy oblystyq balalar-jasóspirimder kitaphanasynda kitap kóremesi jáne mýzykalyq kesh ótti.

Erteń N. Pogodın atyndaǵy oblystyq orys drama teatrynda Naýryz meıramy men jazýshy Ǵ. Músirepovtyń 110 jyldyǵyna arnalǵan oblystyq aqyndar aıtysy ótedi.

Naýryz meıramynyń saltanatty ashylýy 22 naýryzda M. Jumabaev alańynda ótedi.

Sondaı-aq ortalyq alańda halyq sheberleri jasaǵan qoldanbaly óner buıymdarynyń kóremesi ótedi. M. Jumabaev alańynda ónerkásiptik óndiris ónimderiniń jármeńkesi uıymdastyrylýda.

Oblystyq qýyrshaqtar teatrynda balalar úshin «Aldar Kóse» qoıylymy kórsetiledi, qazaq mýzykalyq-drama teatrynda «Naýryz qutty bolsyn» atty merekelik kontsert ótedi.

23 naýryzda N. Pogodın atyndaǵy oblystyq drama teatrynda qazaqstandyq estrada juldyzdarynyń qatysýymen kontserttik baǵdarlama josparlanýda.