Petropavlda 22 naýryzda ulttyq kıim kıgender qoǵamdyq kólikte tegin júredi
PETROPAVL. KAZINFORM – Petropavlda Ulystyń uly kúni – Naýryz meıramyna arnalǵan merekelik baǵdarlama búginnen bastaldy. 23 naýryzǵa deıin oblys ortalyǵynda 100-den astam túrli is-shara uıymdastyrý josparlanǵan.
Soltústik Qazaqstan oblystyq ishki saıasat basqarmasynyń málimetinshe, búgin Amal merekesine oraı Dostyq úıinde etnomádenı birlestikterdiń uıymdastyrýymen kezdesý ótedi. Jalpy Kórisý kúni óńirdegi barlyq bilim ordalarynda atap ótilip, balalarǵa meıramnyń mán-maǵynasy aıtyldy.
Bul kúnderi túrli kórmeler, qaıyrymdylyq aktsııalary, chellendjder, kezdesýler jáne kontserttik baǵdarlamalar ótedi.
15 naýryz — «Qaıyrymdylyq» kúnine oraı oblys ákiminiń atynan aýyzashar asy beriledi. Volonterler, túrli konfessııa ókilderi turmysy tómen, zeınetkerlerdiń otbasylaryn aralap, kómek kórsetedi.
16 naýryz — «Mádenıet jáne ulttyq salt-dástúr» kúnine oraı ortalyq alańda akterlerdiń qatysýymen arnaıy is-shara ótedi. Kitaphanalar, bilim berý mekemeleri, mýzeıler ulttyq salt-dástúrdi nasıhattap, kezdesýler uıymdastyrmaq.
17 naýryz — «Shańyraq» kúninde S. Muqanov atyndaǵy qazaq sazdy-drama teatrynda respýblıkalyq aqyndar aıtysyn tamashalaýǵa bolady.
Ortalyq alańda «Sýper-áje» baıqaýy ótedi.
Al A.Vınokýrov sport saraıynda sport saǵaty uıymdastyrylady.
18 naýryz — «Ulttyq kıim» kúni «Dostyq mol» saýda úıinde ulttyq kıim men áshekeılerdiń kórme-jármeńkesi ótpek.
19 naýryz — «Jańarý» kúnine de kóptegen merekelik is-shara josparlanǵan. Keshke qala turǵyndary men qonaqtary Aqan Seri atyndaǵy oblystyq fılarmonııada qazaq halyq aspaptary orkestriniń «Naýryz-kóktem» kontsertin tamashalaı alady.
20 naýryz — «Ulttyq sport» kúni Jambyl aýdany Presnovka eldi mekeninde dene shynyqtyrý-saýyqtyrý kesheni paıdalanýǵa berilmek. Jańa nysanda qazaq kúresinen oblystyq týrnır, asyq atý, toǵyzqumalaq jáne sadaq atýdan ashyq týrnır ótedi.
«Qulager» ıppodromynda da qazaqtyń ulttyq sport oıyndarynan túrli jarys ótedi.
21 naýryz — «Yntymaq» kúni Petropavldaǵy bas alańda Naýryz meıramy toılanady.
22 naýryz — «Jyl basy». Bul kúni negizgi merekelik is-sharalar bas alańda uıymdastyrylmaq. «Baýyrsaq-Fest-2024» josparlanǵan. Al bul kúni ulttyq kıim kıgender qoǵamdyq kólikte tegin júrmek.
23 naýryz — «Tazarý» kúni. Bul kúni birqatar ekologııalyq is-sharalar, senbilikter uıymdastyrylmaq.
