Petropavlda myńnan astam kópqabatty úıdiń tek 9-y qysqa ázirlik qujatyn aldy
«SevKazEnergo» AQ baspasóz qyzmetiniń málimetinshe, oblys ortalyǵyn jylýmen qamtyp otyrǵan «Petropavl jylý jelileri» JShS bıylǵa josparlaǵan jóndeý jumystarynyń jartysyna jýyǵyn, ıaǵnı 41,9 % aıaqtady. Mamandardyń kúzge deıin 14 shaqyrymǵa jýyq jylý jelisin jańartýy qajet.
Budan basqa josparlanǵan 4 shaqyrym qubyrdyń jartysyna jýyǵynyń jylý jibermeıtin qaptamasy qalpyna keltirilip, 25 sorǵy stansasyndaǵy qondyrǵylar jóndeldi.
Qubyrlardyń jóndelýine baılanysty qazirgi ýaqytta Petropavlda 3 jeke baspana jáne kópqabatty 8 turǵyn úı ystyq sýdan ajyratylǵan.
«Kásiporynnyń qondyrǵylary - 70,35 %, magıstraldy jelileri - 76,37 %, taratý jelileri - 60,04 % eskirgen. Qazirgideı qalypta ustaý úshin de jylda barlyq qubyr jelisiniń shamamen 4 % - 18,4 km aýystyryp otyrý qajet. Biraq qazirgi tarıfpen biz bul eń tómengi deńgeıdi de jóndeı almaı otyrmyz. Al tozý jáne jylý energııasyn joǵaltý deńgeıin azaıtý úshin jyl saıyn barlyq qubyrlardyń 5 %, ıaǵnı 23 km qubyrdy jańalap otyrý kerek», - deıdi kásiporynnyń bas dırektory Andreı Kalınıchev.
«Petropavl jylý jelileri» JShS mamandarynyń aıtýynsha, qysqy jylytý maýsymynan sátti ótýdiń bir joly – baspanany jylytý maýsymyna sapaly daıyndaý. Petropavlda 1090 kópqabatty turǵyn úı bolsa, sonyń 183-i jylytý júıesine gıdravlıkalyq synama júrgizip, jýǵan. Ázirshe tek kóp qabatty baspanalardyń tek toǵyzy ǵana qysqy jylytý maýsymyna ázirlik qujatyn aldy.