Petropavlda múlik ıeleri birlestikteri qurylyp jatyr
PETROPAVL. QazAqparat – Elimizde 2022 jylǵy 1 shildeden keıin páter ıeleri kooperatıvteri (PIK) jumysyn toqtatady. Onyń ornyna múlik ıeleriniń birlestikteri (MIB) qurylady. Jańa basqarý organynyń artyqshylyǵy jaıynda búgin Petropavl qalalyq turǵyn úı ınspektsııasy bóliminiń basshysy Erlan Qaıyrbekov brıfıngte aıtyp berdi, dep habarlaıdy QazAqparat tilshisi.
MIB – bul kommertsııalyq emes túrdegi zańdy tulǵa. Ony kópqabatty bir turǵyn úıdiń páter ıeleri qurady. Budan basqa turǵyndar jaı seriktestik (JS) qura alady. Olar azamattyq shart negizinde úıdi birlesip basqaryp, kútip ustaı alady. Júıe turǵyndar qarajatynyń ashyq jumsalýyn qamtamasyz etýge, sondaı-aq olarǵa basqarý tásilin tańdaý quqyǵyn berý úshin engizilgen.
«Qazirgi ýaqytta páter ıeleriniń kooperatıvteri bir úıge ǵana emes, birnesheýine qyzmet etedi. Olardyń bir ǵana ortaq shoty bar. Saldarynan páter ıeleri óz aqshalarynyń qandaı maqsatta jumsalyp jatqanyn baqylaı almaıdy. Sondyqtan jańa basqarý úlgisiniń artyqshylyǵy kóp bolmaq. Eń basty aıyrmashylyǵy – ár kópqabatty úıdiń óz esepshoty bolady. Jınalǵan qarajat tek sol úıdiń muqtajyna jumsalady. Aqshanyń maqsatty ustalýyn ár turǵyn jáne jergilikti bılik baqylaı alady. Qazirdiń ózinde Petropavlda múlik ıeleriniń birlestikteri qurylyp jatyr», - deıdi Petropavl qalalyq turǵyn úı ınspektsııasy bóliminiń basshysy Erlan Qaıyrbekov.
MIB tóraǵasy turǵyndar arasynan bir jylǵa saılanady. PIK-te buryn ár úıdiń óz aýla sypyrýshylary, elektrıkteri, býhgalterleri bolsa, endi tek tóraǵa ǵana bolady. Ol úıge qajetti qyzmetterge tapsyrys beredi. Ol shart boıynsha servıstik qyzmet sýbektilerin: aýla sypyrýshylardy, elektrıkti tartady. Olardyń aqysyn óziniń kondomınıým obektisi boıynsha baqylaıdy.
«Ár úıdiń ortaq múlkin basqarýǵa jáne kútip-ustaýǵa arnalǵan paıdalaný shyǵystaryn esepteýdiń bekitilgen ádistemesi, ıaǵnı jyl ishinde oryndalýy qajet jumystardyń qajetti tizbesi bolady. Osy jumystar tizimine sáıkes osy úıdi basqarý jáne kútip ustaý shyǵyndarynyń jyldyq smetasy jasalady. Qala ákiminiń ókimimen kondomınıým obektisiniń ortaq múlkin basqarýǵa jáne kútip-ustaýǵa arnalǵan shyǵystar smetasynyń eń az esebin qurý boıynsha jumys toby quryldy. Jumys toby jergilikti ókildi organda bekitý úshin joba ázirleıdi», - deıdi Erlan Qaıyrbekov.
Jaı seriktestikti qurý úshin úı turǵyndarynyń 100 % kelisimi qajet. Olardyń árqaısysy senimhat berip, birlesken qyzmet týraly kelisimge qol qoıýy kerek.
«Úı turǵyndary páter ıeleri bergen senimhat negizinde áreket etetin senimdi tulǵany tańdaı alady. Senim bildirilgen adam bir jyl merzimge saılanady. JS-ny ádilet organdarynda tirkeý qajet emes, alaıda jergilikti atqarýshy organdarda esepke turýy qajet», - deıdi bólim basshysy.
Búginde Petropavlda 1090 kóppáterli turǵyn úı bar. Onyń ishinde 624-inde basqarý formasy bar. 328 úıde jaýapty adamdar bolsa, 138 kópqabatty úı «ıesiz» bolyp esepteledi.
