Petropavlda múgedektigi bar qyzdy zorlady degen 2 er adam anyqtaldy

PETROPAVL. QazAqparat – Petropavl polıtsııasyna 32 jastaǵy syrqat qyz jalǵa beriletin páterde zorlanǵany jaıynda aryz tústi. Kúdiktilerdiń ekeýi anyqtaldy, dep habarlaıdy QazAqparat tilshisi.

Petropavlda múgedektigi bar qyzdy úsh er adamnyń zorlaǵany jaıynda aqparat áleýmettik jelide tarady.

Oqıǵa 3 tamyzda bolǵan. Zardap shekken qyzdyń tanysynyń aıtýynsha, ol boıjetkenniń aqyl-esiniń kemistigi bar, anasy da aýyrady. Kópqabatty úıdiń aýlasynda átkenshek teýip otyrǵan ony kórshileriniń biri qasyndaǵy úıge, jalǵa beriletin páterge alyp ketken. Ol jerde taǵy eki er adam bolǵan. Tek tańerteń ǵana jibergen.

«Tańerteń meniń aldymnan shyqty, ony urǵan. Ne bolǵanyn aıtyp berdi. Polıtsııaǵa baryp aryz jazdy. Saraptamadan ótti», - deıdi zardap shegýshiniń tanysy.

Soltústik Qazaqstan oblysy Polıtsııa departamenti baspasóz qyzmeti osy derekke qatysty túsinik berdi.

«3 tamyz kúni Petropavl qalalyq polıtsııa basqarmasyna Abaı kóshesindegi jalǵa beriletin páterlerdiń birinde oblys ortalyǵynyń 32 jastaǵy turǵyny zorlanǵany týraly habarlama tústi.

Bul fakti QR QK 120-baby 2-bóligi, 1-tarmaǵy «Zorlaý» boıynsha Sotqa deıingi tergep-tekserýlerdiń biryńǵaı tizilimine tirkeldi.

Polıtsııa SQO-nyń 48 jáne 32 jastaǵy eki turǵynyn anyqtady.

Qazirgi ýaqytta osy derek boıynsha tıisti saraptamalar taǵaıyndaldy, qajetti tergeý amaldary júrgizilip jatyr. Onyń nátıjesi boıynsha zańdy protsessýaldyq sheshim qabyldanady. Qalǵan aqparat QR QPK 201-babyna sáıkes jarııa etilmeıdi», - delingen habarlamada.