Petropavlda múgedektigi bar 9 jasar qyz terezeden qulady
PETROPAVL. KAZINFORM — Turǵyn úıdiń ekinshi qabatyndaǵy balkonynan qulap ketken qyz aýtızm dıagnozymen psıhıatrdyń dıspanserlik baqylaýynda bolǵan.
Soltústik Qazaqstan oblystyq densaýlyq saqtaý basqarmasy baspasóz qyzmetiniń málimetinshe, oqıǵa 16 mamyr kúni túski saǵat 12:00 shamasynda bolǵan. Qyz bala oblystyq kópbeıindi balalar aýrýhanasyna jedel túrde jetkizildi.
— Qulaý kezinde bala esin joǵaltpaǵan. Oqıǵa ornynan ony jedel járdem brıgadasy anasynyń súıemeldeýimen aýrýhanaǵa alyp keldi. Balany shuǵyl túrde travmatologııa bólimine jatqyzyp, dınamıkalyq baqylaý men tolyq medıtsınalyq tekserý jumystaryn júrgizdik. Qazirgi tańda patsıenttiń jaǵdaıy turaqty, ortasha aýyr deńgeıde dep baǵalanǵan. Medıtsınalyq baqylaý kezeńinde jaǵdaıy nasharlaǵan joq, — deıdi mamandar.
Dárigerlerdiń baqylaýynda bolǵan qyz esin anyq biledi, túndi de tynysh ótkizgen. Qazirgi ýaqytta patsıentke konservatıvti em júrgizilip jatyr. Sonymen qatar, oǵan arnaıy emdik-qorǵanysh ortopedııalyq rejım taǵaıyndalǵan.
Buǵan deıin Petropavlda sáýir aıynda úsh bala terezeden qulaǵanyn jazǵan edik.
