Petropavlda muǵalimderge baspana sertıfıkattary beriletin boldy
PETROPAVL. QazAqparat – Soltústik Qazaqstan oblysynda ótken dástúrli tamyz konferentsııasynda keler jyldan bastap usazdarǵa turǵyn úı sertıfıkaty beriletindigi aıtyldy, dep habarlaıdy QazAqparat tilshisi.
SQO-da bilim salasyna bólinetin qarajat mólsheri jyldan-jylǵa artyp keledi. Bıyl respýblıkalyq qazynadan 87 mlrd teńge bólindi. Bul ótken jylmen salystyrǵanda 32 % artyq jáne oblys bıýdjetiniń 30 % quraıdy. Nátıjesinde 249 bilim berý oshaǵy kúrdeli jóndeýden ótip, 231 mekteptiń jıhazy jańalandy.
Qoǵamda ustazǵa degen kózqaras ta ózgerip keledi. Bıyl mektep támamdaǵan 377 túlek muǵalim bolýǵa sheshim qabyldady. Olardyń 60 paıyzy memlekettik grantqa ıe boldy. Al keler jyldan bastap oblys ortalyǵynda turatyn ustazdarǵa turǵyn úı sertıfıkattary berile bastamaq. Jaǵymdy jańalyqty oblys ákimi Qumar Aqsaqalov jetkizdi.
«2021 jyly qalada turatyn bilim salasynyń qyzmetkerlerine baspana sertıfıkattaryn berý úshin bıýdjetten 250 mln tg bólinedi. Bir muǵalim 1 mln tg ala alady», - dedi Qumar Aqsaqalov.
Tamyz konferentsııasynda óz salasynyń úzdikteri de eleýsiz qalmady. Olarǵa «Bilim salasynyń úzdigi», «Ybyraı Altynsarın» jáne «Maǵjan Jumabaev» atyndaǵy tós belgiler tabystaldy.
Aıta keteıik, búginde SQO-da 477 bilim ordasy men 487 mektepke deıingi mekeme bar. Jańa oqý jylynda 8,5 myńǵa jýyq búldirshin 1-shi synypqa barady.
