Petropavlda mototsıkl astyna túsken jaıaý júrginshi kóz jumdy
ASTANA. KAZINFORM — Petropavlda Nazarbaev kóshesinde adam ólimimen aıaqtalǵan apat boldy, dep habarlaıdy SQO PD baspasóz qyzmeti.
Polıtsııa Petropavl qalasynda 20 qyrkúıek kúni saǵat 23:15 shamasynda Nazarbaev kóshesinde bolǵan adam ólimine ákelgen jol-kólik oqıǵasy boıynsha sotqa deıingi tergeý júrgizip jatyr.
— Aldyn ala málimet boıynsha, Yamaha mototsıkliniń 41 jastaǵy júrgizýshisi joldyń júrý bóligin kesip ótip bara jatqan 38 jastaǵy jaıaý júrginshini qaǵyp ketken. Alǵan jaraqattarynan jaıaý júrginshi oqıǵa ornynda kóz jumdy. Dene jaraqattaryn alǵan mototsıkl júrgizýshisi aýrýhanaǵa jetkizildi, — deıdi tártip saqshylary.
Vedomstvo málim etkendeı, tergeý aıasynda qajetti tergeý áreketteri júrgizilip, tıisti saraptamalar taǵaıyndaldy. Oqıǵanyń barlyq mán-jaıy, onyń ishinde jol-kólik oqıǵasyna ákelgen sebepter men jaǵdaılar anyqtalyp jatyr.
Polıtsııa departamenti júrgizýshiler men jaıaý júrginshilerdi, ásirese táýliktiń qarańǵy ýaqytynda, Jol qozǵalysy erejelerin qatań saqtaýǵa shaqyrady.
Buǵan deıin Qonaevta bala kólik astyna túsip, mert bolǵanyn jazǵanbyz.
