Petropavlda mototsıkl men avtokólik soǵylyp, 2 adam zardap shekti
PETROPAVL. QazAqparat – Petropavlda «Quqyqtyq tártip» jedel-profılaktıkalyq is-sharasy aıasynda rólge mas kúıde otyrýdyń 49 deregi anyqtaldy, dep habarlaıdy QazAqparat tilshisi.
SQO Polıtsııa departamenti baspasóz qyzmetiniń málimetinshe, «Quqyqtyq tártip» aktsııasy tórt kún aralyǵynda ótti. Maqsat – kólikti mas kúıde júrgizgenderdi anyqtap, jol apattarynyń aldyn alý. Óıtkeni rólge spırttik ishimdik iship otyrý qashanda qaýip-qater týdyryp, saldary ókinishke uryndyrýy múmkin. Osyndaı oqıǵanyń biri 9 maýsym kúni Petropavlda tirkeldi.
«Racer» mototsıklin mingen 26 jastaǵy qala turǵyny Ryjov kóshesiniń boıynda «Daewoo Matiz MH» kóligine soǵyldy. Avtomashınanyń rólinde 1972 jyly týǵan Petropavl turǵyny bolǵan. Kóliktegi áıel zardap shekken joq. Al mototsıkldiń júrgizýshisine medıtsınalyq kómek qajet bolsa, onyń qasyndaǵy jolaýshysy aýrýhanaǵa jetkizildi.
Qan taldaýy eki aıaqty kólik júrgizýshisiniń mas bolǵanyn kórsetti. Qazirgi ýaqytta ony qylmystyq jaýapkershilikke tartý máselesi sheshilip jatyr. Polıtseılerdiń aıtýynsha, mototsıkldiń ıesi ony óz atyna tirkemegen. Osyǵan baılanysty júrgizýshige qatysty «Kólik quralyn paıdalaný erejesin buzý» baby boıynsha ákimshilik materıal jınaldy.
«Bıyldan bastap mas kúıde rólge otyryp, jol-kólik apatyna jol bergenderdiń qylmystyq jaýapkershilikke tartylatynyn taǵy bir márte eske salamyz. Eger de jol apaty kezinde adam densaýlyǵyna ortasha zııan kelse, kináli júrgizýshi bir jylǵa deıin bas bostandyǵynan jáne 10 jylǵa deıin kólik basqarý quqynan aıyrylýy múmkin», - deıdi SQO PD bastyǵynyń birinshi orynbasary Qanat Aıtbaev.
«Quqyqtyq tártip» jedel-profılaktıkalyq is-sharasy aıasynda Petropavlda tórt kúnde rólge mas kúıde otyrǵan 49 júrgizýshi anyqtaldy. Jalpy SQO-da jyl basynan mas júrgizýshilerdiń kinásinen 25 jol-kólik apaty tirkeldi. Onyń tórteýinde eki adam jaralansa, taǵy ekeýi qaza tapty.
