Petropavlda monıtorıng toby 100 shaqty adam jınalǵan toıdy taratty
Soltústik Qazaqstan oblysy polıtsııa departamenti baspasóz qyzmetiniń málimetinshe, monıtorıngtik toptar demalys kúnderi reıdke shyǵyp, toıhanalardy, dámhanalardy, jalǵa beriletin kottedjderi tekseredi.
Osyndaı tekseris kezinde mamandar Petropavldaǵy toıhanalardyń birinde bolyp jatqan toıdyń ústinen tústi.
100 shaqty adam qatysqan otbasylyq mereke taratyldy.
Toıhana ákimshiligine qatysty QR ákimshilik quqyq buzýshylyq kodeksiniń 425-baby «Halyqtyń sanıtarııalyq-epıdemıologııalyq salamattylyǵy salasyndaǵy zańnama talaptaryn, sondaı-aq gıgıenalyq normatıvterdi buzý» boıynsha materıal jınaldy.
Materıal sheshim qabyldaý úshin Petropavl qalalyq sanıtarlyq-epıdemıologııalyq baqylaý basqarmasyna tapsyryldy.
«Soltústik Qazaqstan oblysy koronavırýs ınfektsııasynyń taralýy boıynsha áli de «qyzyl» aımaqta tur. Halyq kóp jınalatyn is-sharalardy ótkizýge tyıym salynǵan. Keı kásipkerler qabyldanǵan shekteýlerdi buzý óz klıentteriniń densaýlyǵyna qaýip tóndiretinin eskermeıdi. Jyl basynan beri oblys ortalyǵyndaǵy klýbtar, dámhanalar men toıhanalardyń ıeleri osyndaı quqyq buzýshylyq úshin 58 ret jaýapqa tartyldy», - deıdi Petropavl qalasy polıtsııa basqarmasy jergilikti polıtsııa qyzmeti bóliminiń bastyǵy Rýstam Sadýlov.
