Petropavlda modýldik polıtsııa beketine aıyna 200-ge jýyq adam júginedi
PETROPAVL. QazAqparat - Petropavlda bir jyldyń ishinde 4 modýldik polıtsııa beketi ashyldy. Onda patrýldik polıtsııa batalonynyń qyzmetkerleri men ýchaskelik ınspektorlar táýlik boıy kezekshilik etedi, dep habarlaıdy QazAqparat.
Osyndaı beketterdiń biri aýdan ortalyǵy Taıynshada jumys istep tur.
Jumystyń jańa formaty «jurtqa jaqyn polıtsııa» qaǵıdatyn qamtamasyz etýge múmkindik beredi.
Zamanaýı modýlder adamdar kóp jınalatyn jerlerde ornalasqan.
«Ótinishter ártúrli. Kóbine suraqtar tek quqyqtyq tártipke qatysty bolmaıdy. Búgin bir azamat qujat taýyp alyp, bizge ákeldi. Biz qujat ıesiniń telefon nómirin tez anyqtap, habarlasyp, sol kúni-aq qaıtardyq», - deıdi jańa jyl qarsańynda kezekshilikte bolǵan Petropavl qalasy PB patrýldik polıtsııa batalonynyń ınspektory Berik Tólepbergenov.
Modýlderdegi jańajyldyq kezekshilik tynysh ótti.
«Tún ortasyna taman adamdar úılerine tarady, kóshede eshkim bolǵan joq. Túngi birden keıin adamdar serýendeýge shyǵa bastady. Tynysh ótti», - dedi polıtsııa leıtenanty Bekbolat Búrkitbaı.
Aıyna orta eseppen 200-ge jýyq azamat modýldik posttardaǵy kezekshiliktegi polıtsııa qyzmetkerlerine júginedi.
Polıtseılerdiń basty mindeti – barlyq ótinishterge der kezinde jaýap berý.
