Petropavlda meımanhana órtenip, 30 adam evakýatsııalandy
PETROPAVL. QazAqparat – Petropavlda «Raı» meımanhana-kesheni órtenip, órt sóndirýshiler 30 adamdy evakýatsııalady, dep habarlaıdy QazAqparat tilshisi.
Soltústik Qazaqstan oblysy tótenshe jaǵdaılar departamenti baspasóz qyzmetiniń málimetinshe, 101 pýltine Petropavldaǵy N.Nazarbaev kóshesi 221 mekenjaıynda ornalasqan meımanhana-kesheninde órt shyqqandyǵy jóninde habarlama saǵat 9-dan 18 mınýt ketkende túsken. «Raı» meımanhana-kesheni 5 qabatty turǵyn úıdiń, burynǵy jataqhananyń birinshi qabatynda ornalasqan.
Oqıǵa ornyna jedel jetken órt sóndirýshiler arnaıy baspaldaqpen 30 adamdy, sonyń ishinde 5 balany evakýatsııalady. Meımanhanadan 2 adam ózdiginen qaýipsiz jerge shyqty.
Órtti sóndirý barysynda mamandar 50 lıtrlik gaz ballonyn alyp shyqty. Saǵat 10.30 shamasynda órt tolyq sóndirildi. Zardap shekkender joq.
Mamandardyń aıtýynsha, órt keshenniń saýnasynan shyqqan. 15 sharshy metr aýmaq zaqymdandy. Aldyn ala boljam boıynsha, órt - otty abaısyz paıdalanýdan shyqqan. Ázirge naqty sebebi men kelgen shyǵyn mólsheri belgisiz.
