Petropavlda mereke kúnderi polıtsııaǵa turǵyndar 1621 ret telefon shalǵan

PETROPAVL. QazAqparat – Petropavlda polıtsııa departamenti jańajyldyq kezekshilikti jáne patrýldeý jumystaryn qorytyndylady, dep habarlaıdy QazAqparat tilshisi.

Soltústik Qazaqstan oblysy Polıtsııa departamenti baspasóz qyzmetiniń málimetinshe, mereke kúnderi óńirde 500-den astam polıtsııa qyzmetkeri táýlik boıy qoǵamdyq tártipti qadaǵalap, jol qaýipsizdigin qamtamasyz etti. Jańa jyl túninde Petropavlda 210 polıtsııa ofıtseri men serjanty, onyń ishinde 75 áskerı qyzmetshi quqyqtyq tártiptiń saqtalýyn baqylady. 31 jeltoqsanda «102» jedel arnasy arqyly 565 habarlama qabyldandy, onyń 77-sine jedel áreket etý qajet boldy.

Qańtardyń 1-i men 4-i aralyǵynda bir táýlikte eki aýysymmen qoǵamdyq tártipti saqtaýǵa 15 avtopatrýl tartyldy. Osy kúnderi «102» arnasyna 1621 habarlama kelip túsken. Beınebaqylaý kameralarynyń kómegimen 76 ákimshilik quqyq buzýshylyq anyqtaldy. Jańa jyldyń alǵashqy tórt kúninde oblys joldarynda 2 jol-kólik oqıǵasy tirkelip, 3 adam jaraqat aldy.

Petropavl qalalyq polıtsııa basqarmasy jedel basqarý ortalyǵy bastyǵynyń orynbasary Qanat Qasenovtyń aıtýynsha, mereke kúnderi tynysh ótti. Aýyr qylmystar men iri jol-kólik oqıǵalary tirkelmegen. Polıtsııaǵa kóp jaǵdaıda otbasyndaǵy janjalǵa qatysty habarlasqan.

Jeltoqsannyń 15-si men 30-y aralyǵynda SQO-da «Pırotehnıka» jedel-profılaktıkalyq is-sharasy ótti. Lıtsenzııasy joq pırotehnıkany satqandarǵa 18 hattama toltyryldy.