Petropavlda mereke kúnderi «102» arnasyna 1,6 myńnan astam telefon qońyraýy tústi
PETROPAVL. QazAqparat – Petropavl polıtseıleri mereke kúnderi kúsheıtilgen rejimde qyzmet atqardy. Tórt kúnde tek «102» arnasyna ǵana 1600-den astam qońyraý túsken, dep habarlaıdy QazAqparat tilshisi.
Soltústik Qazaqstan oblysy polıtsııa departamenti baspasóz qyzmetiniń málimetinshe, oblys ortalyǵynda azamattardyń tynyshtyǵy men qaýipsizdigin táýlik boıy 200-den astam polıtsııa qyzmetkeri qamtamasyz etti. Nátıjesinde, jyldyń sońǵy kúni - jańa jyl túni tynysh ótti.
Petropavl qalalyq polıtsııa basqarmasy jedel basqarý ortalyǵynyń bastyǵy Erik Quljanovtyń aıtýynsha, 31 jeltoqsannan 1 qańtarǵa qaraǵan túni «102» pýltine 389 ret telefon qońyraýy kelip túsken. Sonyń 91 jaǵdaıy polıtsııa qyzmetkerleriniń jedel den qoıýyn qajet etti.
Jalpy, mereke kúnderi, 31 jeltoqsan men 3 qańtar aralyǵynda polıtsııa qyzmetkerleri 1600-den astam telefon qońyraýyn qabyldady. Onyń ishinde 479 habarlama – jasalǵan qylmystar men oqıǵalar týraly; 21-i – jol-kólik oqıǵalary boıynsha; túngi ýaqytta tynyshtyqty buzý boıynsha – 17 qońyraý túsken. Sondaı-aq otbasylyq janjaldarǵa qatysty 45 qońyraý jáne urlyq faktileri boıynsha 26 habarlama tirkeldi.
Petropavl qalalyq jedel basqarý ortalyǵynyń kezekshi beınebaqylaý ınspektorlary mereke kúnderi 61 ákimshilik quqyq buzýshylyqty; jol júrisi qaǵıdalaryn buzýdyń 26 faktisin jáne qoǵamdyq oryndarda ishimdik iship, mas kúıde júrýdiń 35 deregin tirkedi.
