Petropavlda memlekettik rámizder kúnine oraı avtosherý ótti
PETROPAVL. QazAqparat – Petropavlda memlekettik rámizder kúnine oraı jáne ótkeli turǵan referendýmdy qoldaǵan avtosherý ótti, oǵan tý kótergen 30 avtokólik júrgizýshisi qatysty, dep habarlaıdy QazAqparat tilshisi.
Petropavlda memlekettik rámizderdiń 30 jyldyǵyna oraı jáne aldaǵy referendýmdy qoldaý maqsatynda avtosherý ótti. Іs-sharany oblys ortalyǵyndaǵy jastar qoǵamdyq uıymdary ótkizdi.
Petropavl turǵyny Mıhaıl Bıtkov avtosherý ótetindigin avtoklýbtaǵy tanystarynan bilgen. Jigit kóligin saılap, kók týdy ilip, búgin basqalarmen birge jolǵa shyqty.
«Estisimen birden qatysamyn dep sheshtim. Bul patrıotızmdi nasıhattaıtyn mańyzdy aktsııalardyń biri. Ásirese jastardy otansúıgishtikke tárbıeleıdi. Elimizdiń negizgi nyshandaryn qurmetteýge, maqtan tutýǵa mindettimiz», - deıdi Mıhaıl Bıtkov.
Petropavl áýejaıynan bastalǵan is-sharanyń bıylǵy ereksheligi - oblys ortalyǵyndaǵy negizgi kóshelerdi barynsha qamtýǵa tyrysqan.
«Avtosherýge Petropavldaǵy avtoklýbtar, volonterler jáne qala turǵyndary qatysty. Aldyn ala habarlandyrý bergen edik, jastar birden qoldaý bildirdi. Búginnen bastap kóp qabatty úılerdiń balkondaryna kók týymyzdy ilip jatyr. Erteń saǵat 10.00-de bir mezette respýblıka boıynsha gımn aıtylady. Biz de soǵan qosylamyz. Maqsat – memlekettik rámizderge qurmetimizdi kórsetý jáne patrıotızmdi nasıhattaý», - deıdi Petropavl qalalyq jastar resýrstyq ortalyǵynyń jetekshisi Álfarabı Myńbaı.
