Petropavlda mektepterdiń birine oqýshy tapansha alyp kelgen
PETROPAVL. KAZINFORM — Petropavlda joǵary synyp oqýshysy mektepke tapansha ustap kelgen.
Soltústik Qazaqstan oblystyq bilim basqarmasynyń málimetinshe, oqıǵa 5 aqpan kúni Petropavldaǵy mektepterdiń birinde bolǵan.
Mekteptiń ákimshiligine ata-analardan joǵary synyp oqýshylarynyń birinde syrtqy pishini tapanshaǵa uqsas zat bolýy múmkin degen aqparat túsedi. Bilim berý uıymynyń basshylyǵy jedel áreket etip, oqýshy arnaıy kúzet qyzmetiniń qatysýymen mektep ákimshiligine shaqyryldy. Sonymen qatar, balanyń zańdy ókilderi men ıývenaldyq polıtsııa ınspektory dereý habardar etildi.
— Tekserý barysynda quqyq qorǵaý organdary qarýǵa uqsas zatty tárkiledi. Osy fakti boıynsha sotqa deıingi tergep-tekserý amaldary júrgizilip, oqıǵanyń mán-jaıy anyqtalyp jatyr, — delingen basqarma jaýabynda.
SQO Polıtsııa departamenti baspasóz qyzmetiniń málimetinshe, tárkilengen zat pnevmatıkalyq tapansha bolyp shyqqan jáne ol atys qarýy sanatyna jatpaıdy. Oqıǵa barysynda eshkim zardap shekken joq.
— Tekserý nátıjesi boıynsha kámeletke tolmaǵan jasóspirim usaq buzaqylyq jasaǵany úshin ákimshilik jaýapkershilikke tartyldy. Al onyń zańdy ókili bala tárbıesi men onyń qaýipsizdigin qamtamasyz etý jónindegi mindetterin tıisinshe oryndamaǵany úshin jaýap berdi. Sonymen qatar, bilim berý organdarynyń atyna osy jaǵdaıǵa yqpal etken sebepter men jaǵdaılardy joıýǵa baǵyttalǵan sharalar qabyldaý týraly usynys engizildi. Tekserý aıaqtalǵannan keıin bilim berý uıymynyń laýazymdy tulǵalary men oqý ornynyń qaýipsizdigin qamtamasyz etken kúzet agenttigi qyzmetkerleriniń áreketterine de quqyqtyq baǵa beriletin bolady, — deıdi polıtsııa ókilderi.
Buǵan deıin Atyraýda qatarlastaryn baltamen qýalaǵan oqýshyǵa qatysty qylmystyq is qozǵalǵanyn jazǵan edik.