Petropavlda mektepte jóndeý barysynda eki áıel bıikten qulap ketti
PETROPAVL. KAZINFORM – Olardyń ekeýi de Abaı atyndaǵy mamandandyrylǵan qazaq mektep-gımnazııasynda eden jýýshy bolyp jumys istegen.
Petropavl qalalyq bilim bóliminiń málimetinshe, oqıǵa 29 shilde kúni bolǵan. Mekteptegi kosmetıkalyq jóndeý jumystary kezinde eki áıel bıiktikten abaısyzda qulap ketken.
- Jazataıym oqıǵadan keıin mektep ákimshiligi birden jedel medıtsınalyq járdem brıgadasyn shaqyrdy. Zardap shekkender medıtsınalyq mekemege jetkizilip, olarǵa qajetti medıtsınalyq kómek kórsetilip jatyr. Olardyń bireýi 2008 jyldan, ekinshisi 2015 jyldan bastap eńbek etip jatyr. ıAǵnı birinshi jyl jumys istep jatqan joq. 6 shilde kúni jumysqa kirispes buryn qaýipsizdikpen tanysyp, qoldaryn qoıǵan, - deıdi bilim bóliminiń ókilderi.
Mamandardyń aıtýynsha, qoldanystaǵy zańnama talaptaryna sáıkes, oqıǵanyń barlyq mán-jaıy men sebepterin anyqtaý maqsatynda qyzmettik tekserý júrgiziletin bolady.
Soltústik Qazaqstan oblystyq densaýlyq basqarmasynyń málimetinshe, Petropavldaǵy qalalyq kópbeıindi jedel medıtsınalyq járdem aýrýhanasynyń travmatologııa pýnktine bıiktikten qulaǵan eki áıel shuǵyl túrde jetkizildi. Ekeýine de jedel medıtsınalyq kómek kórsetilip, qazirgi ýaqytta olar bólimshede em qabyldap jatyr.
Birinshisi - 57 jastaǵy áıel. Ol shamamen 4-5 metr bıiktikten qulaǵan. Dárigerlerdiń tekserýi barysynda kompıýterlik tomografııa jasalyp, omyrtqanyń keýde jáne bel bólimderiniń kompressııalyq synyqtary anyqtaldy.
Naýqasqa aýyrsynýdy basatyn em júrgizildi. Sondaı-aq omyrtqany qozǵaltpaý maqsatynda arnaıy qatty qalqanǵa jatqyzyldy.
Zardap shekken ekinshi áıel 54 jasta. Ol da shamamen 4-5 metr bıiktikten qulaǵan. Naýqasta ashyq synyq bolyp, birden hırýrgııalyq óńdeý operatsııasy jasaldy.
Mamandardyń aıtýynsha, tekserý barysynda áıelge bas-mı jaraqaty jáne aıaq-qoldarynyń kóptegen synyǵy bar aýyr aralas jaraqat dıagnozy qoıyldy. Emdeý barysynda gıpstik longeta salynyp, súıekterdiń durys bitýin qamtamasyz etý úshin qańqalyq tartý ádisi qoldanyldy. Operatsııadan keıin naýqastyń jaǵdaıy turaqty.
Buǵan deıin Pavlodar oblysynyń alty turǵyny aýa raıynyń qolaısyzdyǵynan jaraqat alǵanyn jazǵan edik.
