Petropavlda mektepke jarylǵysh zat qoıyldy dep «ázildegen» jasóspirim sottaldy
PETROPAVL. KAZINFORM - Petropavldyń 9-synyp oqýshysy ózi oqıtyn mektepke bomba qoıylǵany týraly jedel qyzmetke jalǵan habarlama bergen.
Soltústik Qazaqstan oblystyq prokýratýranyń málimetinshe, oqıǵa byltyr qazan aıynda bolǵan. Jasóspirimniń «ázilinen» keıin, oqý protsesi buzylyp, mektepti bosatýǵa týra kelgen.
Ǵımaratty arnaıy qyzmetter teksergennen keıin aqparat rastalmady.
Petropavl prokýratýrasy kámeletke tolmaǵanǵa QR Qylmystyq kodeksiniń 273-baby, atap aıtqanda, terrorızm aktisi týraly kórineý jalǵan habarlama berý boıynsha aıyp taqty.
Kámeletke tolmaǵandardyń isteri jónindegi mamandandyrylǵan aýdanaralyq sot oqýshyny kináli dep tanydy. Oǵan jazasyn óteýdiń barlyq merzimine probatsııalyq baqylaý belgileı otyryp, 1 jyl bas bostandyǵyn shekteý túrindegi jaza taǵaıyndady.
Úkim zańdy kúshine engen joq.
Prokýratýra organdary terrorızm aktileri týraly kórineý jalǵan habarlamalar qoǵamdyq qaýipsizdikke qaýip tóndiretinin, tótenshe jaǵdaılar men memlekettik qyzmetterdiń qalypty jumysyna kedergi keltiretinin jáne qarjylyq shyǵyndar men qylmystyq jaýapkershilikke ákep soǵatynyn eske salady.
Buǵan deıin jyl basynan beri jalǵan aqparat taratqan 60-qa jýyq adam jaýapqa tartylǵanyn jazǵan edik.
