Petropavlda mektepke balta-pyshaq ákelgen 9-synyp oqýshysyn qarýsyzdandyrǵan eki jasóspirim marapattaldy
Petropavlǵa QR Qorǵanys mınıstrliginen aqparattyq-nasıhattaý toby kelip, «Jańa Qazaqstannyń tiregi - Aıbyndy jastar» patrıottyq aktsııasyn ótkizip jatyr. Maqsat - Qarýly Kúshterdiń jáne áskerı qyzmettiń bedelin arttyrý, sondaı-aq jastardy Otan aldyndaǵy boryshyn oryndaýǵa shaqyrý jáne áskerı-patrıottyq tárbıe berý.
Saltanatty is-shara barysynda erlik kórsetken eki jasóspirim - № 4 mekteptiń oqýshylary Nurıslam Sandybaı jáne Aldııar Nurtaev marapatqa ıe boldy. Olarǵa Qorǵanys mınıstrliginiń Alǵys haty berildi.
«Synyptyń qasynda balalarmen sóılesip turdyq. Bir kezde qasymyzdan 10 synyp oqýshysy júgirip ótti. Onyń artynan betine maska kıgen bala umtyldy da, bir kezde kilt toqtady. Burylyp, qasynda turǵan qyzdy ura bastady. Biz eń aldymen muny ázil shyǵar dep oıladyq. Biraq, qyz otyryp jylaı bastady. Men oǵan kómek kerek ekenin birden túsinip, qol jumsaǵan balaǵa qaraı júgirip, art jaǵynan ustaı aldym. Men ustap turǵanda kómekke Aldııar kelip, onyń qolynan baltany julyp aldy», - deıdi marapattalǵandardyń biri Nurıslam Sandybaı.
15 jasar bala 9 b synyp oqýshysy. Mektep bitirisimen mashına jasaý isiniń ınjeneri mamandyǵyn tańdamaq. 4 jyl karatemen, 2 jyl dzıýdomen, voleıbolmen aınalysqan Nurıslam áskerge baryp, azamattyq boryshyn óteýge de qarsy emes.
«Er balalarǵa, jigitterge aıtarym, basqalarǵa kómek kerek bolyp jatsa, qarap turmańyzdar. Biz basqalarǵa qamqor bolýǵa mindettimiz. Al búgin bizdi elep-eskerip jatqandarǵa alǵys aıtamyn.
Men ózimdi batyrmyn dep eseptemeımin, biraq jaqsy is istedim dep oılaımyn. Ata-anam meni maqtan tutady», - deıdi Nurıslam.
Esterińizge salaıyq, oqys oqıǵa 13 aqpan kúni Petropavldaǵy № 4 mektepte bolǵan edi. Osy oqý ordasynyń 9-synyp oqýshysy sómkesine tyǵyp, ózimen birge as úıde qoldanylatyn balta men pyshaqty ala kelip, 3 oqýshyny jaraqattady.
