Petropavlda mektep tóbesiniń sylaǵy qulap, 3 bala zardap shekti

PETROPAVL. KAZINFORM – Petropavldaǵy Qojabergen jyraý atyndaǵy №6 mektepte sabaq ýaqytynda synyptyń tóbesiniń sylaǵy qulady. Saldarynan úsh oqýshyny aýrýhanaǵa tústi.

Soltústik Qazaqstan oblysy ákimdigi ishki saıasat basqarmasynyń málimetinshe, oqıǵa búgin, saǵat 17.20 shamasynda bolǵan. Synyp tóbesiniń sylaǵy shamamen 2 sharshy metr aýmaqta qulap túsken.

Saldarynan 12 jastaǵy eki jáne 13 jastaǵy bir bala kópsalaly oblystyq balalar aýrýhanasyna jetkizildi.

— Osy oqıǵaǵa qatysty komıssııa qurylady. Onyń quramyna tótenshe jaǵdaılar departamentiniń, bilim basqarmasynyń, qurylys jáne qala qurylysyn baqylaý basqarmalarynyń ókilderi, ata-analar jáne basqalar kiredi, — dedi bilim basqarmasynan.

SQO densaýlyq saqtaý basqarmasy baspasóz qyzmetiniń málimetinshe, balalarǵa «mıy shaıqalǵan» degen dıagnoz qoıyldy.

— Balalar oblystyq kópbeıindi balalar aýrýhanasynyń jaraqat bóliminde jatyr. Jaǵdaılary turaqty túrde ortasha. Aýyr jaraqat alǵandar joq. Búgin dárigerlerdiń baqylaýynda bolady. Erteń tekseristen ótedi. Jaǵdaılary jaqsaryp jatsa ambýlatorlyq em alý úshin úılerine jiberiledi, — dedi basqarmanyń baspasóz hatshysy Gúlnar Qalıeva.

Aıte ketsek, úsh qabatty mektep 2020 jyly 31 tamyzda paıdalanýǵa berilgen, ǵımarat 900 orynǵa shaqtalǵan.

Buǵan deıin SQO-da apatty mektepter men jataqhana tapshylyǵy máseleleri tolyq sheshilgendigin jazǵan edik.