Petropavlda mektep oqýshysy jigittermen ınternette boıjetken bolyp tanysyp, aqsha tapqan
PETROPAVL. QazAqparat – Petropavlda 16 jastaǵy bozbala ınternette jalǵan paraqsha ashyp, jigitterdi aqshaǵa aldap kelgen, dep habarlaıdy QazAqparat tilshisi.
Soltústik Qazaqstan oblysy polıtsııa departamenti baspasóz qyzmetiniń málimetinshe, Petropavldyń birqatar turǵyny ınternet-alaıaqtyq týraly aryzdarymen polıtsııaǵa júgindi. Jábirlenýshilerdiń deni jastar. Olar «VKontakte» áleýmettik jelisinde sulý boıjetkenmen tanysqandaryn aıtqan. Birer ret hat almasqannan keıin «vırtýaldy tanys» qaryzǵa aqsha suraǵan, alaıda ony qaıtarýdy oılamaǵan. Shyǵyn somasy 13 myń teńgeden bastap 316 myń teńgege deıin jetedi.
Petropavl qalalyq polıtsııa basqarmasy krımınaldyq polıtsııa qyzmetkerleri paraqshanyń jalǵan ekenin anyqtady. Jedel ýákilder kúdiktini tapty, ol Petropavldyń 16 jastaǵy mektep oqýshysy bolyp shyqty. Paraqshadaǵy esimdi jasóspirim kezdeısoq tańdap, tartymdy boıjetkenniń fotosyn ınternetten alyp ornalastyrǵan.
Kúdikti bala ata-anasynyń kepildigimen bosatyldy. Atalǵan faktiler «Alaıaqtyq» baby boıynsha Sotqa deıingi tergep-tekserýlerdiń biryńǵaı tizilimine engizildi. Búgingi tańda iste 4 epızod bar, polıtseıler jábirlenýshilerdiń sanyn naqtylap jatyr.
«Internet jelisinde aqshamen baılanysty suraqtar týyndaǵan kezde, saq bolýdy suraımyz. Kıberqylmyskerler adamdardyń ınternet jelisindegi paraqshalarynyń kóshirmesin aınytpaı jasap, olardyń tanystarynan belgili bir sebepterdi syltaý etip, aqsha suraǵan derekter de kezdesedi. Sondaı-aq, ınternette taýarlar satyp alý kezinde aldyn ala tólem jasaýǵa kelispeńizder. Budan bólek, eshkimge eshqashan jeke derekterińizdi: bank kartalarynyń nómirleri men paroldaryn, kartanyń ekinshi jaǵynda jazylǵan cvv-kodtardy, sms arqyly keletin bir rettik kodtardy aıtpańyzdar», - deıdi krımınaldyq polıtsııa bóliminiń bastyǵy Darhan Zııafıddın.
