Petropavlda mektep qurylysyna kedergi keltirgen kottedj órtenip ketti
PETROPAVL. QazAqparat – Petropavlda birer aıdan beri mektep qurylysyna kedergi bolyp turǵan eki qabatty salynyp bitpegen úı órtenip ketti, dep habarlaıdy QazAqparat tilshisi.
SQO Tótenshe jaǵdaılar departamenti baspasóz qyzmetiniń málimetinshe, Petropavldaǵy Altynsarın 71 mekenjaıyndaǵy qurylysy bitpegen úıdiń janyp jatqandyǵy jóninde habar tańǵy saǵat 5.55-te túsken. Oqıǵa ornyna órt sóndirýshiler kelgenshe kottedj de, oǵan jaqyn ornalasqan sharýashylyq nysandary da otqa oranyp úlgeripti.
Jalyndy aýyzdyqtaýǵa 4 arnaıy tehnıka men 21 adam jumyldyryldy. Órt saǵat 7.45-te tolyǵymen sóndirildi. Mamandardyń aıtýynsha, 285 sharshy metr aýmaq órtenip, úıdiń shatyry jáne sharýashylyq nysandary tolyq janyp ketti.
Baspanaǵa elektr qýaty jalǵanbaǵan. Órt shyqqan kezde úıde eshkim bolmaǵan. Qazir oqıǵa ornynda órt-synaq zerthanasynyń mamany jáne SQO Polıtsııa departamentiniń jedel-tergeý toby jumys istep jatyr.
Bul baspana Petropavl qalasynda salynyp jatqan 900 oryndyq mekteptiń qurylysyn birer aıdan beri tejep kelgen bolatyn. 200 sharshy metrlik kottedj tolyq salynyp bitpegen. Ieleri onyń ekinshi qabatynda turyp jatqan. Qalalyq ákimdik olarǵa jalpy aýmaǵy 120 sharshy metrlik eki páter usynǵanymen, baspana ıeleri bul sheshimmen kelispegen bolatyn. Іs sotqa deıin jetip, qarasha aıynda berilýi tıis mekteptiń qurylysy ýaqytsha toqtatyldy.
