Petropavlda massaj salonynyń ıesi bir bólmeni jezókshelikpen aınalysýǵa bergen

PETROPAVL. QazAqparat – Petropavlda «Stop trafık» jedel-profılaktıkalyq is-sharasy ótti. Aktsııa aıasynda jeńgetaılyqtyń eki deregi jáne bir jynystyq qanaý faktisi anyqtaldy, dep habarlaıdy QazAqparat tilshisi.

Soltústik Qazaqstan oblysy polıtsııa departamenti baspasóz qyzmetiniń málimetinshe, Petropavldaǵy massaj salondarynyń biriniń ıesi jezókshelikpen aınalysýǵa bólme bergen. Osy derek boıynsha ákimshilik materıal jınaldy. Zań buzýshy endi 150 AEK mólsherinde aıyppul tóleýi múmkin.

Bul derek «Stop trafık» jedel-profılaktıkalyq is-sharasy aıasynda anyqtaldy. Aktsııa úsh kún boıy ótti.

SQO PD uıymdasqan qylmysqa qarsy kúres basqarmasynyń qyzmetkerleri adam saýdasymen baılanysty qylmystyń aldyn alý úshin halyqty aqparattandyrý jumysyn kúsheıtti. Petropavldaǵy Qazaqstan Konstıtýtsııasy kóshesinde tártip saqshylary eriktilermen birlesip aqparattyq paraqshalar taratty, Qazaqstan halqy Assambleıasy fılıalynda kolledj oqýshylaryna jáne jastarmen jumys isteıtin adamdarǵa dárister oqydy.

«Adam saýdasy» kóptegen qylmyspen baılanysty. Adamdar ózderin jáne jaqyndaryn qorǵaýdyń qarapaıym tásilderin bilýi qajet. Birinshiden – mol jáne tez tabyspen baılanysty usynystarǵa senbeý, ásirese shetelde, eger jumysqa qabyldaý resmı jaǵdaıda júrgizilmese jáne sizden qujattardy berýdi talap etse, úzildi-kesildi bas tartqan durys.

Jalpy «Stop trafık» jedel-profılaktıkalyq is-sharasy aıasynda jedel jumystar da júrgizildi. Nátıjesinde jeńgetaılyqtyń eki deregi boıynsha jáne bir jynystyq qanaý faktisi boıynsha qylmystyq is qozǵaldy», - deıdi SQO PD uıymdasqyn qylmysqa qarsy kúres basqarmasynyń bastyǵy Jandos Basybaev.