Petropavlda mashına zaýytynyń burynǵy dırektory 11 jylǵa sottaldy

ASTANA. KAZINFORM - Petropavl aýyr mashına jasaý zaýytynyń bas jáne atqarýshy dırektorlaryna qatysty, sondaı-aq memlekettik qorǵanys tapsyrysy sheńberinde qozǵaltqyshtar men gıdrobloktardy jetkizýdi júzege asyrǵan kásipkerge qatysty qylmystyq is tergeldi, dep habarlaıdy Qarjylyq monıtorıng agenttiginiń baspasóz qyzmeti. 

2022 jyly zaýyt Qorǵanys mınıstrliginen áskerı tehnıkany jóndeýge tapsyrys alǵany anyqtaldy, ony oryndaý kezinde jeke kásipkermen jalpy somasy 283,3 mln teńgege qosalqy bólshekter jetkizýge shart jasaldy.

Oryndalǵan jumystar aktilerine kedergisiz qol qoıǵany jáne shartty oryndaý kezinde jalpy qamqorlyǵy úshin bas dırektor atqarýshy dırektor arqyly kásipkerden 100 myń AQSh dollary (45 mln teńge) somasynda para aldy.

Sot zaýyttyń burynǵy bas dırektoryn asa iri mólsherde para alǵany úshin 11 jylǵa, atqarýshy dırektoryn - tórt jylǵa bas bostandyǵynan aıyrdy.

Sonymen qatar, memleket kirisine 40 mln teńgege para qarjysyna satyp alynǵan páter tárkilendi. Qalǵan 5 mln teńge sottalǵandardan teń úlestermen óndirildi.