Petropavlda mas júrgizýshi áıeldi qaǵyp ketti
PETROPAVL. QazAqparat – Petropavlda kólikti mas kúıde tizgindegen er adam jaıaý júrginshiler jolaǵynda áıeldi soǵyp ketti, dep habarlaıdy QazAqparat tilshisi.
Soltústik Qazaqstan oblysy polıtsııa departamenti baspasóz qyzmetiniń málimetinshe, jol-kólik oqıǵasy Petropavldaǵy Ýálıhanov kóshesinde, jol qozǵalysy rettelmeıtin jaıaý júrginshiler ótkelinde bolǵan. «Toyota RAV-4» avtokóliginiń júrgizýshisi kósheni kesip ótpek bolǵan 49 jastaǵy qala turǵynyn soǵyp ketti. Budan keıin júrgizýshi bir baǵytta ketip bara jatqan «Volkswagen» avtokóligimen soqtyǵysqan.
Jol-kólik oqıǵasy saldarynan áıel jaraqat alyp, medıtsınalyq mekemege jedel járdem kóligimen jetkizildi. Eki kólikte te zaqymdandy.
«Toyota» tizgininde Petropavldyń 54 jastaǵy turǵyny bolǵan. Medıtsınalyq kýálandyrý onyń mas kúıde bolǵanyn kórsetti.
Bul fakti QR Qylmystyq kodeksiniń «Alkogoldik, esirtkilik jáne (nemese) ýytqumarlyq masań kúıde kólik quraldaryn basqaratyn adamdardyń jol júrisi nemese kólik quraldaryn paıdalaný qaǵıdalaryn buzý» baby boıynsha Sotqa deıingi tergep-tekserýlerdiń biryńǵaı tizilimine engizildi. Saraptamalar taǵaıyndaldy. Avtokólik arnaıy turaqqa qoıyldy.
«Jalpy 3 aıdyń ishinde oblys aýmaǵynda mas júrgizýshiler 4 jol-kólik apatyn jasady. Saldarynan 3 adam qaza taýyp, 2-ýi jaraqattandy. Polıtseıler mas kúıde kólik júrgizý faktilerin anyqtaý jáne jolyn kesý boıynsha maqsatty jumys júrgizedi. Jyl basynan oblys boıynsha 263 mas júrgizýshi ákimshilik jaýapqa tartyldy», - deıdi SQO Polıtsııa departamenti jergilikti polıtsııa qyzmeti basqarmasynyń bastyǵy Aıdyn Baımatov.
