Petropavlda mas kelinshek kóligimen adamdy soǵyp, aıaldamaǵa kirip ketti
PETROPAVL. QazAqparat – Kólikti mas kúıde basqarǵan 28 jastaǵy Petropavl turǵyny adam soǵyp, aıaldamany zaqymdady, dep habarlaıdy QazAqparat tilshisi.
Petropavlda qalalyq polıtsııa basqarmasynyń málimetinshe, oqıǵa 24 shilde saǵat 19.15 shamasynda «Romashka» saıajaı qoǵamdastyǵynyń mańynda bolǵan. Petropavldyń 28 jastaǵy turǵyny rýlge ıe bola almaı qalyp, «Lada» kóligimen júrginshini jáne aıaldamany soqqan.
Jedel járdem kóligi 47 jastaǵy áıeldi aýrýhanaǵa jetkizdi.
Medıtsınalyq kýálandyrý «Lada» kóligi júrgizýshisiniń mas bolǵanyn kórsetti. Avtomashına arnaıy turaqqa qoıyldy.
Jol-kólik oqıǵasy boıynsha júrgizýshige ákimshilik materıal jınaldy. Іs protsessýaldyq sheshim shyǵarý úshin Petropavl qalasynyń ákimshilik quqyqbuzýshylyqtar boıynsha mamandandyrylǵan sotyna jiberiledi.
