Petropavlda mas er adam orynsyz «ázildep», qamaýǵa alyndy

PETROPAVL. KAZINFORM – Petropavlda jarylǵysh zat týraly jalǵan habar berip, arnaıy dúrliktirgen er adam qamaýǵa alyndy.

Soltústik Qazaqstan oblysy polıtsııa departamenti baspasóz qyzmetiniń málimetinshe, 23 qańtarǵa qaraǵan túni «102» arnasyna Petropavldaǵy Qazaqstan Konstıtýtsııasy kóshesindegi úılerdiń biriniń páterinde jarylǵysh zat qoıylǵany týraly qońyraý tústi. Dabyl sıgnaly boıynsha oqıǵa ornyna kezekshi jedel-tergeý toby, jarǵysh tehnıkter, jyldam qımyldaıtyn arnaıy jasaqtyń, patrýldik polıtsııa batalonynyń jáne basqa da múddeli qyzmetter men memlekettik organdardyń qyzmetkerleri jetti. Tekserý nátıjesinde jarylǵysh qurylǵy tabylmady.

Jalǵan habarlama jasady degen kúdikpen 35 jastaǵy Petropavl turǵyny anyqtalyp, ustaldy. Mas er adam úıdiń kireberisinde ustaldy.

Ol osyǵan deıin de qoǵamdyq jerde mas kúıde júrgeni úshin ákimshilik jaýapkershilikke tartylǵan. Jazaǵa bir óte qoımaǵan. Quqyq buzýshylyqty qaıtalaǵany úshin ákimshilik qamaqqa alyndy.

«Ákimshilik jazasyn ótep shyqqan soń QR Qylmystyq kodeksiniń 273-baby «Terrorızm aktisi týraly kórineý jalǵan habarlaý» boıynsha qylmystyq jaýapkershilikke tartylady. Baptyń sanktsııasyna sáıkes, 5 myń aılyq eseptik kórsetkishke deıin iri kólemdegi aıyppul tóleıdi nemese 5 jylǵa deıingi merzimge bas bostandyǵynan aıyrylýy múmkin», - deıdi SQO PD ekstremızmage qarsy is-qımyl basqarmasynyń qyzmetkerleri.

Ótken jyly polıtsııaǵa qońyraý shalyp, jalǵan habarlama jasaǵany úshin 2 soltústikqazaqstandyq qylmystyq jaýapkershilikke tartyldy.
Aqerke Dáýrenbekqyzy