Petropavlda mas er adam kóshede qar tazalap júrgen traktordy minip ketken
PETROPAVL. QazAqparat – Petropavlda mas er adam qar syrýǵa shyqqan traktordy minip ketip, kóshe kezgen, dep habarlaıdy QazAqparat tilshisi.
Soltústik Qazaqstan oblysy polıtsııa departamenti baspasóz qyzmetiniń málimetinshe, Petropavlda patrýldi polıtsııa batalonynyń ekıpajy tańǵy saǵat 6.00 shamasynda Partızanskaıa kóshesinde eki traktorshynyń janjalynyń ústinen túsken. Olardyń bireýi mas bolyp shyqty.
Sol kúni Petropavldaǵy JShS biriniń jumysshysy «MTZ-80.1» traktorymen kósheni qardan tazartýǵa shyqqan. Jambyl-Chelıýskın kósheleriniń qıylysynda traktorynyń qozǵaltqyshynda aqaý barlyǵyn baıqaǵan ol qajetti qosalqy bólshekti alý úshin kásiporynǵa ketken. Jol jıeginde turǵan tehnıkany úıine bara jatqan mas er adam baıqap, ot aldyrǵan. Partızanskaıa kóshesinde traktormen ketip bara jatqan ony sol kásiporynnyń basqa mehanızatory baıqap qalǵan. Tanys tehnıkanyń rólinde bógde adamnyń otyrǵanyn baıqap, ony toqtatqan. Patrýldik polıtseıler de sol sáttiń ústinen túsken eken.
Ustalǵan Petropavldyń 32 jastaǵy turǵyny. Qazirgi tańda sot sheshimimen ol «Júrgizýshiniń kólik quralyn alkogoldik, esirtkilik jáne (nemese) ýytqumarlyq masań kúıde basqarýy, sol sııaqty kólik quralyn alkogoldik, esirtkilik jáne (nemese) ýytqumarlyq masań kúıdegi adamnyń basqarýyna berý» baby boıynsha ákimshilik qamaqqa alyndy. Budan bólek, atalǵan fakti QR Qylmystyq kodeksiniń «Avtomobıldi nemese ózge de kólik quralyn jymqyrý maqsatynsyz quqyqqa syıymsyz ıelenip alý» 200-baby boıynsha Sotqa deıingi tergep-tekserýlerdiń biryńǵaı tizilimine engizildi.
«Avtokólikti minip ketý jaǵdaılary kóp jaǵdaıda mas kúıde jasalady.
Jyl basynan oblysta osyndaı 8 fakti tirkeldi. Olardyń barlyǵy ashyldy», - deıdi SQO PD Krımınaldyq polıtsııa basqarmasy bastyǵynyń orynbasary Marat Jumalıev.
