Petropavlda mas adam sýıtsıd jasamaq boldy
ASTANA. KAZINFORM — Petropavlda qalalyq polıtsııa basqarmasynyń bastyǵy dámhanadan shyqqan mas turǵynnyń óz-ózine qol salýyna jol bermedi.
SQO Polıtsııa departamenti baspasóz qyzmetiniń málimetinshe, 20 aqpan saǵat 07:00 shamasynda qalanyń kóńil kóteretin oryndarynyń birinde mas kúıdegi eki turǵyn teris qylyq kórsetip, tártipti buza bastaǵan. Jaqyn mańda kezekshilikte júrgen polıtsııa qyzmetkerleri qoǵamdyq tártipti qamtamasyz etý úshin oqıǵa ornyna keldi.
— Shý shyǵarǵandardyń bireýine sambo ádisterin qoldanyp, qolyna kisen salýǵa týra keldi. Ekinshisi ashý ústinde óziniń tamaǵyna pyshaq taqap, ózin-ózi óltiretinin aıtyp qorqyta bastaǵan. Oqıǵa ornyna dereý qosymsha kúshter jiberildi, sondaı-aq qalalyq polıtsııa basqarmasynyń bastyǵy Marat Jumalıev ta keldi. Osyndaı sıpattaǵy ár túrli qıyn jaǵdaılarda jyldam ári tıimdi sheshim qabyldaı biletin tájirıbeli ofıtser janjalqoımen kelissózder júrgize bastady. Abyroı bolǵanda, yzalanǵan qala turǵyny tynyshtalyp, pyshaǵyn jerge tastady. Keıin polıtseılerdiń talabymen qyzmettik kólikke otyrdy. Qazirgi ýaqytta ustalǵan er adamdardyń ekeýi de polıtsııa qyzmetkerleriniń zańdy talaptaryna baǵynbaǵany úshin 5 táýlikke qamaýǵa alynyp, ákimshilik jazalaryn ótep jatyr, — delingen vedomstvo habarlamasynda.
Bul rette olardyń qalǵan áreketterine bólek quqyqtyq baǵa beriletini aıtyldy.
Osyǵan deıin Petropavldaǵy káriz qudyǵynda jarylys bolyp, bes adam zardap shekkenin jazǵan edik.