Petropavlda mas adam kórshisiniń kóligin aıdap ketken
PETROPAVL. QazAqparat – Soltústik Qazaqstan oblysynda polıtseıler urlanǵan kólikti ıesine qaıtaryp bergen. Al ıesi ol ýaqytta kóliginiń urlanǵanyn bilmegen dep habarlaıdy QazAqparat.
Poıtsııa departamentiniń baspasóz qyzmeti taratqan aqparatqa qaraǵanda, Petropavl turǵyny aýladan kóliktiń kiltin taýyp alǵan. Kilt keıin kórshisiniki ekeni anyqtaldy. Al kiltti taýyp alǵannan keıin birneshe kún ótken soń ishimdik ishken jáne kólik júrgizip kórmegen er adam urlyq jasaıdy.
«Gýskovtardyń otbasyna urlanǵan kóligi qaıtarylyp berildi. Alaıda bul kezde otbasy músheleri kóliginiń urlanǵanyn bilmegen bolatyn. Tártip saqshylary qyraǵylyq tanytyp, qylmystyń izin sýytpaı ashty. Kólik urysy der kezinde qolǵa tústi»,-dep habarlady baspasóz qyzmeti.
Kólikti urlaǵan adam keltirilgen shyǵynnyń ornyn jaýyp, urlanǵan dúnıeni ıesine qaıtardy. Alaıda ol kóliktiń shetin syryp alǵan. Taraptar sotqa deıin tatýlasty, ishimdik iship, kólik júrgizgen azamat ákimshilik jaýapqa tartyldy.
