Petropavlda mamandar kókónisterde nıtrattyń bar-joǵyn tekserdi
PETROPAVL. QazAqparat - Petropavl sýpermarketteriniń birinde Ulttyq saraptama ortalyǵy fılıalynyń qyzmetkerleri kelýshilerge satyp alynǵan ónimderdi tegin tekserý jóninde usynys jasady, dep habarlaıdy «QazAqparat» HAA tilshisi.
Ónimderdiń qaýipsizdigi zerthanalyq qurylǵylar kómegimen tekserildi. Kókónister men jemisterdegi nıtrattar kólemi N-160 ıonometrimen anyqtaldy. Qalalyqtar banan, qyzylsha, alma, sábizdi tekserip kórdi - barlyq ónim tutynýǵa qaýipsiz bolyp shyqty.
«Haılaıt» qurylǵysy arqyly sút ónimderinde, shujyq, irimshik ónimderindegi aýrý týdyratyn bakterııalardyń bar-joǵy tekserildi. Mamandardyń aıtýynsha, ónimdi ázirleýde jáne saqtaýda sanıtarlyq talaptar saqtalmasa, ishek aýrýlaryn qozdyratyn qaýipti zattar paıda bolýy múmkin.
«Aǵzamyzǵa parazıtterdiń túsý-túspeýi bizdiń kókónister men jemisterdi qalaı óńdegenimizge, balyqty qalaı termııalyq óńdeýden ótkizgenimizge baılanysty. Máselen, tuqy balyǵynda opıstorh metotsırkarııi bolýy múmkin. Mundaı jaǵdaıda adam opıstorhoz aýrýyna shaldyǵady», - dedi parazıttik zerthana mamany Evgenııa Gorlenko.
Onyń aıtýynsha, sapasyz balyqtar kóbinese sheteldik óndirýshilerden tabylady.
Tutynýshylar quqyqtaryn qorǵaý bóliminiń jetekshisi Lázim Mııasheva ótken jyly túsken shaǵymdardyń azyq-túlik taýarlarynyń sapasyna qatysty bolǵanyn atap ótti.
«2016 jyly bizge 600-ge jýyq shaǵym kelip tústi. Negizinen, saýda-sattyq salasy boıynsha. Tutynýshylar sapasyz taýarlar týraly jáne mundaı ónimderdi aýystyryp berýden bas tartty dep aryzdandy», - dedi Lázim Mııasheva.
Jyl saıyn 15 naýryzda Tutynýshylar quqyqtaryn qorǵaýdyń Búkilálemdik kúni atalyp ótedi. Meıram tarıhy 1962 jyly Djon Kennedıdiń Kongress otyrysynda «tutynýshy» túsinigine sıpattama berip, onyń negizgi quqyqtaryn atap ótýimen tikeleı baılanysty.
