Petropavlda Maǵjannyń jary Zylıha týǵan úı saqtalǵan
PETROPAVL. KAZINFORM – Kezinde «kópester qalasy» atanǵan Petropavlda búginge deıin kóptegen ásem ǵımarat buzylmaı jetken. Sonyń biri – saýdager Álibaı Muhamedıarovtyń úıi.
Eki qabatty baspana 1870 jyly kópestiń tapsyrysymen salynǵan. Qyzyl kirpishten turǵyzylǵan ǵımarattyń birinshi qabaty dúken men qoıma retinde paıdalanylsa, ekinshi qabatynda úı ıesiniń otbasy turǵan.
SQO tarıhı-mádenı muralardy qorǵaý men qoldaný ortalyǵynyń dırektory Álı Turysovtyń aıtýynsha, bul úı tarıhynyń basqalardan taǵy bir ereksheligi - munda Álibaıdyń qyzy Zylıha dúnıege kelgen.
Keıin ol qazaqtyń kórnekti aqyny Maǵjan Jumabaevqa turmysqa shyqty.
Maǵjan men Zylıha úılengennen keıin 1922 jylǵa deıin osy úıde turǵan eken.
– 1922 jyldan keıin ǵımaratta túrli mekemeler ornalasty. Ekinshi Júnıejúzilik soǵys jyldary munda qalalyq halyq aǵartý bólimi ornalassa, keıin dúken, meıramhana jáne dámhana retinde paıdalanylǵan. Qazirgi ýaqytta munda gazettiń redaktsııasy ornalasqan, - deıdi Álı Turysov.
Ǵımarat kópburyshty etip salynǵan. Onyń negizgi bóligi tikburyshty bolyp kelse, batys jáne ońtústik jaqtaryna shaǵyn qosymsha bólikter jalǵasqan. Terezeleri tikburyshty, al ekinshi qabattaǵy negizgi qasbettegi tereze jaqtaýlary pılıastrlar jáne arkaly sándik elementtermen bezendirilgen.
– Ǵımarat XIX ǵasyrdyń sońy men XX ǵasyrdyń basyndaǵy shaǵyn kópes qalalaryna tán sáýlet úlgisin kórsetedi. Ǵımarattyń ortalyq bóliginde kireberis esik, ekinshi qabatta balkon jáne sándi fronton ornalasqan. Іrgetasy kirpishten qalanyp, shatyr jabyndysy metalldan jasalǵan. Jalpy bıiktigi – 12 metr, - deıdi ortalyq dırektory.
Oblystyq tarıhı-ólketaný mýzeıinde kópes Álibaıdyń fotosy saqtalmaǵanymen, qyzy Zylıhanyń sýretin kórýge bolady. Jalpy, tarıhı-mádenı nysan jaıynda aqparat az.
Kópes Muhamedıarovtyń úıi Petropavldyń mańyzdy sáýlet muralarynyń biri retinde memlekettik qorǵaýǵa alynǵan.
Buǵan deıin Petropavldaǵy tarıhı eskertkish – kópes Strelovtyń úıinde jóndeý jumysy bastalǵanyn jazǵan edik.
