Petropavlda lombardtan jarty mln teńgeniń altyn alqasyn urlaǵan kúdikti ustaldy
PETROPAVL. QazAqparat – Petropavlda quny 555 600 myń teńge turatyn alqany lombardtan ala qashqan kúdikti ustaldy, dep habarlaıdy QazAqparat tilshisi.
Soltústik Qazaqstan oblysy polıtsııa departamenti baspasóz qyzmetiniń málimetinshe, 29 qańtar kúni Petropavldaǵy lombardtardyń birine jigit kelip, salmaǵy 26,24 gr bolatyn altyn alqany kıip kórýdi suraǵan. Quny 555 600 teńge turatyn zergerlik buıymdy qolyna alysymen er adam qasha jónelgen.
Oqıǵa ornyna jetken tergeýshiler beınekameralardy tekserip, qaraqshyny birden tanydy. Petropavldyń 20 jastaǵy turǵyny buǵan deıin de urlyq jasaǵany úshin sottalǵan eken. Alqany urlamas buryn da basqa qylmys jasap, oǵan tártip saqshylary izdeý jarııalaǵan.
Jedel-tergeý barysynda jigit kelesi kúni tanystarynyń biriniń úıinen ustalyp, ýaqytsha ustaý ızolıatoryna qamaldy. Bul derek «Qaraqshylyq» baby boıynsha sotqa deıingi tergep-tekserýdiń biryńǵaı tizilimine engizildi.
«Kúdikti urlanǵan altyn alqany basqa lombardqa ótkizip úlgeripti. Odan kepildeme bılet alyndy.
Jalpy qańtar aıynda óńirde 6 qaraqshylyq oqıǵasy tirkeldi. Qylmyskerlerdi jyldam ustaýǵa beınekameralar kómektesedi. Sondaı-aq bul qondyrǵylardyń qylmystyń aldyn alýda da bereri mol», - deıdi SQO PD krımınaldyq polıtsııa basqarmasynyń bastyǵy Petr Klımov.
