Petropavlda «Leksýspen» eki adamdy qaǵyp ketken júrgizýshi sottaldy

Petropavl qalasynyń turǵyny, 28 jastaǵy Ilıa Starýhın «Kólik quralyn basqaratyn adamdardyń jol júrisi nemese kólik quraldaryn paıdalaný qaǵıdalaryn buzý» jáne «Jol-kólik oqıǵasy bolǵan jerdi qaldyryp ketý» baptary boıynsha aıyptaldy.

«Sot Starýhın Ilıa Vıacheslavovıchti QR Qylmystyq Kodeksiniń 345-baby, 3- tarmaǵy jáne 347-baby boıynsha kináli dep taýyp, QR QK 345-baby boıynsha 4 jylǵa bas bostandyǵynan aıyrý jáne 5 jylǵa deıin kólik quralyn basqarý quqyǵynan aıyrý, 347-bap boıynsha 1 jylǵa deıin bas bostandyǵynan aıyrý jáne 3 jylǵa deıin kólik quralyn basqarý quqyǵynan aıyrý jazasyn kesti», - dedi úkimdi oqyǵan sýdıa Ásem Janalına.

Nátıjesinde jazanyń qatań túri qaldyryldy, I.Starýhın aldaǵy 4 jylyn qylmystyq-atqarý júıesiniń tómen deńgeıdegi qaýipsizdik mekemesinde ótkizetin bolady. Sondaı-aq ol 5 jylǵa deıin kólik júrgizý quqyǵynan aıyryldy.

«Úkim zańdy kúshine engenshe deıin Starýhınge bultartpaý sharasy qamaýda ustaý túrinde ózgerissiz qaldyrylsyn. Jazalaý merzimi 2019 jyldyń 20-aqpanynan bastap eseptelsin. 2018 jyldyń 14 qarashasynan bastap 2019 jyldyń 20-aqpanyna deıin aldyn ala qamaýda otyrǵan kúnderi belgilengen jazany óteý merziminen alynyp tastalsyn», - delingen úkimde.

Sondaı-aq zardap shegýshiler Ksenııa Ovsıannıkovanyń eki ápkesiniń talap-tilekterin sot ishinara qanaǵattandyrdy. I.Starýhın olardyń árqasysyna 2 mln teńge kóleminde moraldyq shyǵyn tóleýge mindetteldi.

Esterińizde bolsa, oqıǵa byltyr qyrkúıekte tańǵy tórt jarymdar kezinde túngi klýbtyń janynda bolǵan edi. «Leksýs» avtokóliginiń júrgizýshisi eki boıjetkendi qaǵyp ketip, olardyń bireýi birneshe kúnnen keıin esin jımastan kóz jumdy. Keıin júrgizýshiniń oqıǵa ornynan izin sýytyp, elden ketip qalǵany habarlandy.

Starýhınge qatysty sot ótken jyldyń 28 jeltoqsanynda bastaldy.