Petropavlda «Qyzyljar barysy» anyqtaldy
PETROPAVL. QazAqparat - Petropavlda qazaq kúresinen «Qyzyljar Barysy - 2019» oblystyq týrnırdiń aqtyq oıyny ótti, dep habarlaıdy QazAqparat tilshisi.
Petropavldaǵy A.Vınokýrov atyndaǵy sport saraıynda ótken «Qyzyljar Barysy - 2019» oblystyq týrnırine bıyl 30 balýan qatysty. Olar - qalalyq, aýdandyq jarystardyń jeńimpazdary.
SQO Dene shynyqtyrý jáne sport basqarmasy baspasóz qyzmetiniń habarlaýynsha, týrnırge 18 jastan asqan jáne 90 keli salmaqtan joǵary balýandar qatystyryldy. Eń eresek sportshynyń jasy elýden asqan.
«Oblysta ulttyq sport túrleri damyp keledi. Qazir 8 myńdaı adam aınalysady. Onyń 2,5 myńnan astamy qazaq kúresin tańdaǵan. Byltyr oblys ákiminiń muryndyq bolýymen «Qyzyljar arlandary» klýby quryldy. Onyń nátıjesin qazirdiń ózinde kórip jatyrmyz. 2-3 kún buryn bizdiń komanda Almatyda qazaq kúresinen ótken QR kýboginen qola júldemen oraldy»,- deıdi oblystyq dene shynyqtyrý jáne sport basqarmasynyń jetekshisi Rýslan Esenalın.
Oıyn qyzyqty, ári tartysty ótti. Nátıjesinde, «Qyzyljar Barysy - 2018» chempıony Muhıt Tursynov bıyl jeńimpaz ataǵyn saqtap qala aldy. 32 jastaǵy Muhıt - qazaq kúresinen eki dúrkin álem chempıony, «Qazaqstan Barysy - 2014» týrnıriniń jeńimpazy. Kásibı balýanǵa 500 myń teńgeniń sertıfıkaty men chempıonnyń altyn belbeýin oblys ákimi Qumar Aqsaqalov tabys etti.
Ekinshi oryn men 300 myń teńge - Ernar Begaıdarovqa, úshinshi oryn men 200 myń teńgeniń sertıfıkaty Altynbek Aýsaǵıtovke buıyrdy. Sondaı-aq eń myqty dep tanylǵan 2 jeńimpaz Nur-Sultan qalasynda ótetin respýblıkalyq «Qazaqstan barysy» týrnırine joldama alady.
