Petropavlda qyzamyqpen syrqattaný bıyl 11 ese artty
Soltústik Qazaqstan oblysy sanıtarııalyq-epıdemıologııalyq baqylaý departamentiniń málimetinshe, Petropavlda qyzamyq boıynsha jaǵdaı turaqsyz, syrqattaný sońǵy 10 aıda 11 ese artyp, 421 jaǵdaı tirkeldi. Aýyrǵandardyń 98 % 14 jasqa deıingi balalar.
«Qyzamyqpen aýyrǵandardyń jasyna toqtalatyn bolsaq, 64 % - 3 pen 6 jas aralyǵyndaǵy balalar, 12 % - 2 jasqa deıingi sábıler. Kásibı quramyna toqtalar bolsaq, 57 % mektepke deıingi mekemelerge baratyndar, 25 % - oqýshylar jáne 16 % úıde otyrǵan balalar», - deıdi Petropavl qalalyq sanıtarııalyq-epıdemıologııalyq baqylaý basqarmasynyń bólim basshysy Serik Aýsatov.
Mamannyń aıtýynsha, qyzamyqtyń negizgi belgileri ıntoksıkatsııa, aýyz jutqynshaqtyń zaqymdanýy jáne usaq bórtpelerdiń paıda bolýy. Qozdyrǵyshy A tobyndaǵy streptokokk, sonymen qatar tamaq aýrýy, sozylmaly tonzıllıt, revmatızm jáne basqa ınfektsııalardy týdyratyn streptokokk ınfektsııalary. Juqpaly aýrý syrqattanǵan jáne aýrý belgisi joq adamnan taraıdy. Naýqas aýrýdyń alǵashqy kúnderinde aınalasyndaǵylar úshin eń qaýipti, tek 3 aptadan keıin ǵana basqalarǵa juqpaıdy.
«Tez taralatyn aýrý, tamaq jáne las qol, tipti turmystyq zattar arqyly da juǵýy múmkin. Syrqattanǵan adam ekinshi qaıtara aýyrýy múmkin. Ádette qyzamyqta dene qyzýy 37°C-tan joǵarylaıdy, teri bórtip, álsizdik, bas aýrýy paıda bolady. Jutý kezinde tamaq aýyrady. Aýrýdyń 4-5 kúninde til»qyzyl«túske boıalady.
Qyzamyq asqynǵan jaǵdaıda irińdi otıt, mıokardıt nekrotıkalyq lımfadenıt bolýy múmkin», - deıdi Serik Aýsatov.
Qyzamyqtyń aldyn alý sharalary joq. Ujymdarda aýrýdyń aldyn-alýdyń negizi syrqatty erte anyqtap, oqshaýlaý.
«Qyzamyq mektepke deıingi uıymda tirkelgen jaǵdaıda sońǵy naýqas oqshaýlanǵan sátten bastap kúntizbelik jeti kúnge karantın jarııalanady. Balabaqshalarda aýyrý qaıtalanǵan jaǵdaıda aýyrǵan balalarda jiti kórinisteri joıylǵannan keıin topqa jiberiledi.
Qyzamyqty taratpaýdyń joly - aýrý belgisi bar balany balabaqsha men mektepke jibermeý. Dene temperatýrasy 37°S jáne odan joǵary kóterilse, álsizdik, júrek aıný, qusý, tamaqtyń qyzarýy, denede bórtpeler bolsa emhanaǵa júginý qajet», - deıdi sanıtar dáriger.