Petropavlda qyrkúıek aıynan bastap qoǵamdyq kólikke saralanǵan tarıf engiziledi
Petropavl qalalyq turǵyn úı-kommýnaldyq sharýashylyǵy, jolaýshylar kóligi jáne avtomobıl joldary bólimi baspasóz qyzmetiniń málimetinshe, 1 qyrkúıekten bastap oblys ortalyǵynda qoǵamdyq kólikterge saralanǵan tarıf engiziledi.
Aqshasyz esep aıyrysatyndarǵa jol aqysy ózgerissiz qalady, ıAǵnı, eresekterge 80 teńge, 7 men 15 jastaǵy balalarǵa 40 teńge. Ol úshin kólik kartasyn alý qajet. Ony Petropavldaǵy birneshe saýda ornynan jáne SQO avtokólik odaǵy qaýymdastyǵynan 500 teńgege satyp alýǵa bolady. Al balalarǵa arnalǵan karta Qazposhta bólimshelerinde satylady.
«Balalarǵa arnalǵan kólik kartasy birinshi jyly tegin beriledi, al kelesi jyly qoldanǵany úshin 500 teńge tóleıdi. Budan basqa NFC modýli bar kez-kelgen bank kartasymen, telefondaǵy «SMS BUS passajır» qosymshasy arqyly nemese QR kod arqyly esep aıyrysýǵa múmkindik beriledi», - deıdi bólimniń baspasóz hatshysy Ásem Aıtýlova.
Petropavl qalalyq ákimdigi bıyl qoǵamdyq kólikte tegin júrýge bolatyn turǵyndardyń tizimin jasady. Oǵan halyqtyń 12 sanaty: ishinde kóp balaly analar, múgedekter, soǵys ardagerleri, qaraýynda múgedek balasy bar ata-ananyń bireýi, turmysy tómen otbasylardyń jáne kóp balaly otbasylardyń balalary kiredi.
«Qoǵamdyq kólikte tegin júrýge quqyǵy barlar úshin fotosy bar arnaıy karta jasalady. Bul arqyly olar esh qıyndyqsyz, qalaǵanynsha qoǵamdyq kólikte júre alady. Kartany alý úshin eńbekpen qamtý jáne áleýmettik baǵdarlamalar bólimine ótinish berý qajet», - deıdi Ásem Aıtýlova.
