Petropavlda qylmys jasap, 7 jyl izdeýde júrgen 61 jastaǵy áıel ustaldy
PETROPAVL. QazAqparat – Petropavlda esirtkige qatysty qylmys jasady degen kúdikpen 7 jyl boıy izdeýde bolǵan 61 jastaǵy áıel ustaldy, dep habarlaıdy QazAqparat tilshisi.
Soltústik Qazaqstan oblysy Polıtsııa departamenti baspasóz qyzmetiniń málimetinshe, Petropavl qalalyq Polıtsııa basqarmasynyń krımınaldyq polıtsııa bólimine 2013 jyldan beri izdeýde júrgen áıelge qatysty jedel aqparat túsedi. Tártip saqshylary birden kórsetilgen mekenjaıǵa attanyp, esirtki qylmysyna kúdiktini Jumysshy kentindegi úılerdiń birinen ustady.
2012 jyly Petropavlda polıtseıler geroın satýmen aınalysqan oblys ortalyǵynyń turǵynyna qatysty qylmystyq isti tergeıdi. Tergeý barysynda esirtki qylmysyna onyń anasy – 1959 jyly týǵan áıeldiń qatysy bolýy múmkindigi anyqtalady. Alaıda, ol joly tártip saqshylary áıeldi tappaı, ornyn sıpap qalǵan edi. Sońǵy segiz jyl boıy onyń qaıda júrgeni belgisiz boldy.
«Áıel qylmystyq jaýapkershilikten ketý úshin 2012 jyly Qostanaıdaǵy týystaryna qashqan. Petropavlǵa qaıtyp kelgenine 4 jyl bolypty. Osy aralyqta Jumysshy kentindegi týysynyń úıin jaǵalaǵan. Polıtseılerdiń kózine túspeý úshin eshqaıda shyqpaı, tyǵylyp otyrǵan. Tanysynda jumysy bolyp, sonymen kezdespek bolǵan qashqyndy tártip saqshylary ustady», - deıdi Petropavl qalalyq PB krımınaldyq polıtsııa bólimi bastyǵynyń orynbasary Jasulan Baldıkov.
Qazir áıel ýaqytsha ustaý ızolıatorynda otyr, kúdiktige qatysty sotqa deıingi tergeý bastaldy.
