Petropavlda qutqarýshylar sý basý qaýpi bar aýdandardy aralady
PETROPAVL. QazAqparat - Petropavlda Tótenshe jaǵdaılar basqarmasynyń qyzmetkerleri sý basý qaýpi bar úılerdi kúndelikti aralap, túsindirý jumystaryn júrgizip jatyr. Olar jadynamalar taratyp, tótenshe jaǵdaıǵa daıyn bolý qajettigin eskertýde, dep habarlaıdy QazAqparat tilshisi.
Petropavldaǵy sý qoımasynyń deńgeıi aldaǵy kúnderi shamamen 1,1 metrge deıin kóterilýi múmkin dep boljanyp otyr. Mamandardyń aıtýynsha, qaterli mejeden asatyndyqtan Zarechnyı kentine baratyn joldy sý basýy múmkin. Kent aýmaǵy 65 ga alyp jatyr, 2 myńǵa jaqyn turǵyny bar. Osydan 2-3 jyl burynǵy tasqyn sýda mundaǵy 60-qa jýyq turǵyn úı men aýla sý astynda qalǵan edi.
«Bul is-sharalardy sý basý qaýpi bar aımaqtarda júrgizip jatyrmyz. Turǵyndardy eskertip, sý basqan jaǵdaıda ózderin qalaı ustaý kerektigi týraly túsindirýdemiz. Jadynamalarda bizdiń anyqtama telefon nómirlerimiz kórsetilgen. Bizdiń departamentte 18 naýryzdan bastap arnaıy shtab jumys istep jatyr», - deıdi Petropavl qalasy Tótenshe jaǵdaılar basqarmasynyń bas ınjeneri Turlybek Ǵabdýllın.
«Qazgıdromettiń» oblystyq fılıaly mamandarynyń málimetinshe, Sergeev sý qoımasynyń sý deńgeıi 932 sm, sý mólsheri - 856 mln m³ (syıymdylyǵy 693 mln m3). Táýligine 822 m³/s sý jiberilip jatyr. Sý qoımasy arqyly sýdyń jıekten asyp aǵýy keshe 126 sm bolsa, búgin 132 sm qurady. Petropavl sý qoımasyndaǵy sý deńgeıi keshegi deńgeıde - 709 sm.
Petropavl qalasy boıynsha tasqyn sýmen kúreske qazir 16 qaıyq, 41 sý sorý tehnıkasy men 100-den astam adam saqadaı saı tur.
Illıýstratsııalyq foto: yandex.by
