Petropavlda Qutqarýshylar kúni qarsańynda erekshe aıaldama paıda boldy

PETROPAVL. QazAqparat – Petropavldyń kósheleriniń birinde eskertkishtiń qyzmetin qosa atqaratyn erekshe aıaldama paıda boldy. Ol oblys ortalyǵyndaǵy órt sóndirý bólimderiniń biriniń mańyna qoıylǵan, dep habarlaıdy QazAqparat tilshisi.

Petropavlda Qutqarýshylar kúni qarsańynda órt sóndirý kóligimen bezendirilgen erekshi aıaldama paıda boldy. Ol 19-shy yqsham aýdanda, Nil Bolatbaev kóshesinde ornalasqan. Órt sóndirýshilerdiń aıtýynsha, dál osyndaı aıaldama ashý ıdeıasy burynnan paıda bolǵan. Óıtkeni ol «órt sóndirý bólimi» aıaldamasy dep atalady.

Al nysanǵa jalǵanǵan órt sóndirý kóligi kezinde Mamlıýt aýdanynda jumys istegen.

«Talaı órtti osy tehnıkanyń kómegimen sóndirdik. Bul bizdiń qyzmettegi eń kóne mashına dep aıtýǵa bolady. GAZ-51 kóliginiń negizinde oǵan avtotsısterna qoıylǵan. Bul kólik 1950 jyldary órt sóndirý qyzmetinde qoldanyldy. Bul mashınaǵa 1 myń lıtr sý, 50 lıtr kóbik syıady. Óz zamanynyń keremet tehnıkasy. Aıaldamadan turǵyndar qajetti aqparat alady. Qasymyzda qazaq mektebi ornalasqan. Bul aıaldamadan oqýshylar da kóp minedi, sondyqtan balalar da bizdiń qyzmet týraly qyzyqty aqparat ala alady. Órtke qarsy qaýipsizdik erejeleri týraly jadnamalar ilingen», - deıdi Petropavldaǵy № 2 órt sóndirý bóliminiń bólimshe komandıri Samat Japarov.