Petropavlda qutqarýshylar órt kezinde balany qutqaryp, 12 adamdy evakýatsııalady

27 qyrkúıekte saǵat 14.00-de 101 telefonyna Petropavldaǵy Jýkov kóshesi, 3 úı mekenjaıyndaǵy 6 qabatty turǵyn úıdiń sońǵy qabatyndaǵy páterden órt shyqqany týraly habarlama tústi, dep jazady QazAqparat. 

Dereý kelgen petropavldyq órt sóndirýshiler baspaldaq tambýrynda aldyńǵy esiktiń astynan qalyń tútin shyǵyp jatqanyn baıqady. Tútin páterlerdegi, ásirese joǵarǵy qabattardyń turǵyndaryn evakýatsııalaýǵa kedergi keltirdi. Órt sóndirýshiler 12 turǵyndy, onyń ishinde 3 balany baspaldaqpen kóshege shyǵardy, sol mezette gaz-tútinnen qorǵaý býyny páterge kirdi.

«Páterdegi barlyq bólmeler tútinge toly boldy, jatyn bólmede jeke zattar janyp jatty. Biz bólmelerdiń birinde bala bar ekenin bildik, balanyń ózi 101 qyzmet dıspetcheri Janerke Jıentaevaǵa beıne qońyraý arqyly qaı jerde ekenin kórsetti. Ony sol jerden taptyq, ol tereze aldynda otyryp, ashyq tereze arqyly demalyp otyrǵan. Ony kóterip, kireberisten alyp shyǵyp, jedel járdem qyzmetkerlerine tapsyrdym. Jol boıy ony múmkindiginshe tynyshtandyrdym. Osy kezde úıde kútip otyrǵan úsh balamdy esime aldym», - dedi SQO TJD Órt sóndirý qyzmetiniń №2 mamandandyrylǵan órt sóndirý bólimshesiniń komandıri, azamattyq qorǵaý aǵa serjanty Balqat Tokın.

Aldyn ala aqparatqa sáıkes elektr symdarynyń qysqa tuıyqtalýy saldarynan shyqqan órt saǵat 14.34-te sóndirildi. Onyń aýdany 5 sharshy metrdi qurady. Órt sóndirýge jeke quramnan 23 adam jáne 7 tehnıka jumyldyryldy. Túpkilikti sebepteri men shyǵyndary anyqtalýda.

Órt kezinde 12 jasar bala qutqaryldy. Ol densaýlyǵyna keltirilgen zalal dárejesin anyqtaý úshin aýrýhanaǵa jetkizildi. Onyń ómirine qaýip joq.

Zardap shekken balanyń ákesi ıÝrıı Grıgorevıch órt sóndirýshilerge shyn júrekten alǵysyn bildirdi.