Petropavlda qutqarýshylar muz qursaýynda qalǵan aqqýdy aman alyp qaldy

ASTANA. KAZINFORM- Petropavlda Tótenshe jaǵdaılar mınıstrliginiń qutqarýshylary qanaty synǵan ári álsiregen aqqýdy sýdan shyǵaryp aldy. Qus aýa temperatýrasynyń tómendeýinen sý betinde muz qabaty paıda bola bastaǵan sý aıdynynda ózdiginen jaǵaǵa shyǵa almaǵan.

Petropavlda qutqarýshylar muz qursaýynda qalǵan aqqýdy aman alyp qaldy
Foto: vıdeodan alynǵan skrın

Mınıstrliktiń baspasóz qyzmetiniń habarlaýynsha, jergilikti turǵyndar sý aıdyndarynyń birinen kómekke muqtaj aqqýdy baıqap, qutqarýshylarǵa habarlasqan. Qus ábden álsiregen, bir qanaty synǵan. Muz qatýyna baılanysty aqqý sýdan ózdiginen shyǵa almaǵan.

TJM qyzmetkerleri oqıǵa ornyna jedel jetip, aqqýdy sýdan shyǵaryp, Petropavl qalasyndaǵy botanıkalyq baqqa jetkizdi.

Qazirgi ýaqytta qus mamandardyń baqylaýynda. Oǵan qajetti kútim jasalyp, qalpyna kelýine kómek kórsetiledi.

Osyǵan deıin Pavlodarda jyrtqysh janýardyń shabýylyna ushyraǵan jaraly aqqý qutqarylǵany týraly jazdyq.