Petropavlda qurylysshy topyraqtyń astynda qalyp, jumys ornynda qaza tapty

Petropavlda qurylysta júrgen 35 jastaǵy er adam qaza tapty. Onyń ústine topyraq qulap, basyp qalǵan, dep habarlaıdy QazAqparat tilshisi.

Qaıǵyly oqıǵa keshe keshqurym boldy. Qurylysta jumys istep júrgen er adamdy abaısyzda topyraq basyp qalǵan. Ol jedel járdem kelgenge deıin oqıǵa ornynda qaıtys boldy.

Soltústik Qazaqstan oblystyq polıtsııa departamenti osy oqıǵaǵa qatysty túsinik berdi.

«14 qyrkúıekte Petropavl qalasy polıtsııa basqarmasynyń kezekshi bólimine Partızan-Egemen Qazaqstan kóshesindegi transheıada jumys júrgizý kezinde 35 jastaǵy er adamdy topyraq basyp qalǵandyǵy týraly habarlama tústi. Ol alǵan jaraqattarynan sol jerde qaıtys boldy. Sotqa deıingi tergep-tekserý «Eńbekti qorǵaý qaǵıdalaryn buzý» qylmystyq baby boıynsha júrgiziledi. Qazirgi ýaqytta bolǵan oqıǵanyń mán-jaıy anyqtalyp jatyr», - delingen baspasóz habarlamasynda.

Buǵan deıin Petropavlda 86 jastaǵy keıýanany kólik qaǵyp, onyń oqıǵa ornynda qaza tapqanyn aıtqan edik. Kóliktiń rólinde 60 jastaǵy áıel bolǵan. Qarııa aldyn ala boljam boıynsha, joldyń ruqsat etilmegen jerinen ótpek bolǵan. Ol avtokóliktiń aldynan atyp shyqqanda júrgizýshi kólikti tejep úlgermegen.