Petropavlda qurt-qumyrsqa tabylǵan mektep ashanasyna ata-analar boıkot jarııalady
PETROPAVL. KAZINFORM — Petropavldaǵy Abaı atyndaǵy mamandandyrylǵan mektep-gımnazııasynda oqıtyn oqýshylardyń ata-analary mektep ashanasynan bas tartyp, jappaı ótinish jazyp jatyr.
Petropavl turǵyny Jazıra Zakırıanovanyń aıtýynsha, mektep ashanasynda daıyndalǵan tamaq sol qalpy tur. Synyptar birinen soń biri ashana qyzmetinen bas tartqandyǵyn ótinish arqyly bildirgen.
SQO bilim basqarmasynyń basshysy Aınagúl Suraǵanovanyń aıtýynsha, oqýshylardy tamaqtandyrý sapasyn baqylaýdy kúsheıtý maqsatynda mektepterde qamqorshylyq keńes, ata-analar komıteti, mektep ákimshiligi jáne bilim berý uıymynyń medıtsına qyzmetkeri kiretin brokerajdyq komıssııalar qurylǵan.
— Komıssııanyń negizgi mindeti — jetkiziletin azyq-túlik ónimderiniń sapasyn baqylaý, kúndelikti daıyn taǵamdardyń sapasyn tekserip, tehnologııalyq jabdyqtardyń bar-joǵyn jáne olardyń durys jumys isteýin qadaǵalaý. Ónimder men daıyn taǵamdardy saqtaý jáne jetkizý merzimderiniń saqtalýyn da baqylaýda ustaıdy. Balalardyń naqty tamaqtaný ratsıonynyń kúndelikti jáne aldaǵy mázirge sáıkestigin tekserip, ashananyń sanıtarlyq jaǵdaıyn baqylaýǵa alady, — deıdi basqarma basshysy.
Abaı atyndaǵy mamandandyrylǵan mektep-gımnazııasynda oqýshylardy tamaqtandyrýmen aınalysqan kásipkermen kelisimshartty buzý bastalyp ketti.
— Bul másele bir-eki kúnde sheshiledi dep oılaımyz. Konkýrs ótkiziledi. Jalpy qazir oblysta 439 mektep bolsa, sonyń 292-de 169 kásipker oqýshylardy ystyq tamaqpen qamtyp otyr. 34 myńnan astam bala kúndelikti tegin tamaqtanady. Sonyń ishinde 28 myńǵa jýyǵy — bastaýysh synyp oqýshylary. Mektep ashanalarynda balalardyń ýlaný faktileri tirkelgen joq, — deıdi Aınagúl Suraǵanova.
Buǵan deıin Petropavldaǵy Abaı atyndaǵy mamandandyrylǵan mektep-gımnazııasynda oqýshylardyń tamaǵynan jándikterdiń tabylǵanyn jazǵan edik.
SQO ákimi jaǵdaıdy baqylaýǵa alyp, barlyq mektep ashanalaryn tekserýdi tapsyrdy. Al olqylyqqa jol bergen mektep dırektory jumystan shyǵaryldy.