Petropavlda qurylysqa ruqsat qujattardy negizsiz bermegender jazalandy
PETROPAVL. KAZINFORM — Petropavldyń birneshe turǵyny ákimdikten qurylysqa qajetti qujattardy ala almaı, másele memlekettik organnyń aralasýynan keıin sheshildi.
Memlekettik qyzmet isteri agenttiginiń Soltústik Qazaqstan oblysy boıynsha departamentiniń basshysy Darhan Haırýllınniń aıtýynsha, turǵyndar qoldanystaǵy turǵyn úılerdiń jekelegen bólikterin qaıta jańǵyrtý jáne qaıta josparlaý úshin sáýlet-josparlaý tapsyrmasyn alýǵa ótinish bergen. Alaıda Petropavl qalasy ákimdiginiń qurylys, sáýlet jáne qala qurylysy bólimi ótinishterdi qanaǵattandyrýdan bas tartqan. Mamandar mekenjaı boıynsha egjeı-tegjeıli josparlaý jobasynyń joqtyǵyna baılanysty qurylys pen rekonstrýktsııalaý múmkin emes dep sheshim shyǵarǵan.
— Bul zańsyz sheshim. Qazaqstan Respýblıkasy Ónerkásip jáne qurylys mınıstrligi Qurylys jáne turǵyn úı-kommýnaldyq sharýashylyq isteri komıtetiniń túsindirmesine sáıkes, qoldanystaǵy ǵımarattar men qurylystardyń jekelegen bólikterin salý jáne rekonstrýktsııalaý úshin egjeı-tegjeıli josparlaý jobasy talap etilmeıdi. Tekserý qorytyndysy boıynsha ótinish ıeleriniń quqyqtary qalpyna keltirilip, olarǵa qurylys pen rekonstrýktsııa júrgizýge qajetti sáýlet-josparlaý tapsyrmalary berildi, — deıdi Darhan Haırýllın.
Al memlekettik qyzmet kórsetýden negizsiz bas tartqan jaýapty laýazymdy tulǵalar QR Ákimshilik quqyq buzýshylyq týraly kodeksine sáıkes ákimshilik jaýapkershilikke tartyldy.
Jalpy, jyl basynan beri SQO-da osylaısha segiz adamnyń quqyǵy qorǵaldy. Mamandardyń aıtýynsha, eger memlekettik qyzmetterdiń sapasyna qatysty suraqtar nemese usynystar týyndasa, azamattar «e-Ótinish» júıesi nemese Telegram jelisindegi EgovKzBot2.0 servısi arqyly júginýge bolady.
Buǵan deıin SQO-da memqyzmetshilerdiń eńbek quqyǵy buzylyp kelgenin jazǵan edik.
