Petropavlda qurylysy bastalǵan eki kópqabatty úı buzylýy múmkin
PETROPAVL. KAZINFORM — Bul eki nysanda da zańbuzýshylyqtar anyqtalyp otyr.
Soltústik Qazaqstan oblysy memlekettik sáýlet-qurylys baqylaý jáne lıtsenzııalaý basqarmasynyń málimetinshe, birinshisi — Petropavldaǵy Tańsholpan kóshesi, 2/5 mekenjaıynda qurylysy júrip jatqan kóppáterli úı.
Janyndaǵy turǵyn úı kesheni turǵyndary basqarmaǵa shaǵymdanyp, qurylystyń zańsyz júrgizilip jatqanyn aıtqan.
Sonyń negizinde tapsyrys berýshi jáne qurylysty júrgizýshi «Petromassıv» JShS-ne jospardan tys tekserý júrgizildi.
— Bul kompanııanyń qurylys-montaj jumystaryn júrgizýge lıtsenzııasy joq. Budan bólek nysan qurylysynyń bekitilgen jobalaý-smetalyq qujattamasy jáne tehnıkalyq jáne avtorlyq qadaǵalaýlar joq, eskızdik joba saqtalmaǵan, qurylys-montajdaý jumystaryn júrgizýdi bastaǵany týraly habarlamaǵan. Basqarma nysandy buzýǵa talap aryz berdi. Biraq SQO mamandandyrylǵan aýdanaralyq ákimshilik sotynyń usynysymen kompanııanyń tekserý nátıjesine jáne jedel den qoıý sharalaryna shaǵymdanýyna oraı is sheshilgenge deıin qaıtaryp aldy. Desek te qurylys-montaj jumystaryn 90 kúntizbelik kúnge toqtata turý jedel den qoıý sharasy qabyldandy, — deıdi basqarma basshysynyń mindetin atqarýshy Azamat Isahmetov.
Segiz qabaty da kóterilgen nysan endi buzylýy múmkin.
«Petromassıv» JShS byltyr qyrkúıekte Petropavldaǵy Naberejnaıa kóshesi, 2B mekenjaıynda kóppáterli turǵyn úıdi paıdalanýǵa bergen.
Biraq bul nysanda kompanııa qurylysty ózi júrgizbeı, tek tapsyrys bergen.
— Kompanııa qurylys-montajdaý jumystaryn júzege asyrýǵa lıtsenzııa alý úshin bilikti ınjenerlik-tehnıkalyq qyzmetkerlerdiń, óndiristik bazanyń, materıaldyq-tehnıkalyq jaraqtandyrýdyń, sondaı-aq ІІ jáne І sanattaǵy lıtsenzııa alý úshin jumys tájirıbesi men qoldanysqa berilgen nysandary bolýy qajet, — deıdi Azamat Isahmetov.
Tolyq súrilýi múmkin ekinshi nysan — N.Nazarbaev kóshesi, 329 «a» mekenjaıyndaǵy kommertsııalyq úı-jaı men parkıngi bar kóppáterli turǵyn úı kesheni.
Basqarmanyń málimetinshe, jeke kásipker A.Bespalov syrtqy ınjenerlik jelilersiz jáne jobalaý-smetalyq qujattamasyz qurylysty júrgizgen. Tıisti organdy qurylys-montajdaý jumystaryn júrgizýdi bastaǵany týraly eskertpegen.
Eki qabatyn kóterip úlgengen kásipker de ákimshilik jaýapkershilikke tartyldy, qurylys 90 kúnge toqtatyldy. Nysandy buzýǵa talap aryz jiberildi.