Petropavlda kúrdeli jóndeýden ótken temirjol vokzaly jeltoqsanda paıdalanýǵa beriledi

PETROPAVL. QazAqparat – Petropavlda temirjol vokzaly 3 mlrd teńgege kúrdeli jóndelip, zamanaýı jaraqtandyrylǵan nysan jeltoqsan aıynda paıdalanýǵa berilmek, dep habarlaıdy QazAqparat tilshisi.

Petropavl temirjol vokzalynda jóndeý jumystary 2018 jyly bastaldy. Jobany júzege asyrýǵa «Reseı temirjoldary» AQ 3 mlrd jýyq teńge ınvestıtsııa quıdy. Osy ýaqytqa deıin tıisti jumystardyń 75% atqarylyp, ǵımarattyń shatyry men qasbeti aýystyryldy.

«Ǵımarat 1959 jyly salynǵan. Sodan beri munda kúrdeli jóndeý jumystary júrgizilmegen. Qazir vokzaldyń shyǵys bóligi daıyn. Qurylys materıaldary ýaqtyly jetkizilip, nysanda 70-ke jýyq jumysshy eńbektenip jatyr. Buryn munda bir de bir lıft bolmasa, endi onyń úsheýin qoıamyz, sondaı-aq eskalator jumys isteıdi», - deıdi «RTJ» AQ Petropavl bóliminiń ınvestıtsııa sektorynyń bas ınjeneri Stanıslav Taratýta.

Jóndelip jatqan nysanda jolaýshylarǵa barlyq yńǵaıly jaǵdaı jasalmaq. Qazir bul jerde otandyq 5 birdeı merdiger kompanııa jumys istep jatyr. Jeldetkishter jańartyldy, tablolar aýystyrylyp, kútý zalyndaǵy kıoskiler alynyp tastaldy. Munda endi kishigirim ashanalar men gazet-jýrnal satatyn býtıkter ǵana qalmaq.

Kúrdeli jóndelgen Petropavl temirjol vokzaly jeltoqsanda paıdalanýǵa beriledi.