Petropavlda kúrdeli jóndeýden ótken temirjol vokzaly paıdalanýǵa berildi
PETROPAVL. QazAqparat – Úsh jyl boıy kúrdeli jóndeý jasalǵan Petropavl temirjol vokzaly jańa jyl qarsańynda paıdalanýǵa berildi, dep habarlaıdy QazAqparat tilshisi.
Soltústik Qazaqstan oblysy ákimi baspasóz qyzmetiniń málimetinshe, búgin óńir basshysy Qumar Aqsaqalov kúrdeli jóndelgen Petropavl temirjol vokzalynyń
jumysymen tanysty. Mańyzdy nysan 1966 jyly salynǵan. Alaıda sodan beri kúrdeli jóndelmegen.
Zaman talabyna saı jaraqtandyryp, iske qosý úshin úsh jylǵa jýyq ýaqyt jumsaldy.
«Reseı men Qazaqstan arasyndaǵy tyǵyz yntymaqtastyqtyń arqasynda «Reseı temirjoldary» kompanııasy Petropavl temirjol vokzalynda aýqymdy jumystardy júrgizdi. Búgin biz birlesken eńbektiń jemisin kórip otyrmyz. Bizdiń taraptan vokzal mańy alańy jónge keltirildi. Munyń barlyǵy jolaýshylarǵa yńǵaıly bolýy úshin, qyzmet sapasyn arttyrý úshin jasalyp otyr», - dedi Qumar Aqsaqalov.
Eski vokzaldan tek qabyrǵalary ǵana qaldy. Nysan buryn 300 orynǵa shaqtalsa, jóndeýden keıin odan eki ese kóp jolaýshylardy qabyldaı alady. Endi burynǵydaı baspaldaqpen aýyr sómkelerdi súıreýdiń de qajeti joq. Turǵyndardyń suranysy qanaǵattandyrylyp, jańa lıftter men eskalatorlar ornatyldy.
